ޖަރުމަނު ބުންޑަސްލީގާގައި މިރޭ އަމިއްލަ ދަނޑުގައި 2-0 ގެ ނަތީޖާއަކުން ހަތާބާލިން ބަލިކޮށް، ޓުޗެލްގެ ކޯޗުކަމުގައި ބަޔާން މިއުނިކް އިން ފުރަތަަމަ މޮޅު ހޯދައި، އަލުން ލީގު ތާވަލުގެ އެއްވަނަ މަގާމަށް ކުރިއަށް ޖެހިލައިފިއެވެ.

ބަޔާންގެ ކޯޗުކަމާ ޓުޗެލް ހަވާލުވި ފަހުން އެޓީމު ކުޅުނު ފުރަތަަމަ ހަތަރު މެޗުން މޮޅެއް ހޯދިފައިނުވާ އިރު، ދެ މެޗުން އެއްވަރުވެ، އަނެއް ދެ މެޗުން އެޓީމު ވަނީ ބަލިވެފަ އެވެ.

މިރޭގެ މެޗުގެ ފުރަތަަމަ ހާފުގައި ބަޔާން މިއުނިކް އިން ގިނަވަގުތު ބޯޅަ ހިފަހައްޓައިގެން މޮޅަށް ކުޅުނު އިރު، އެޓީމުން ވަނީ މިހާފުގައި 13 ހަމަލާއެއް ހަތާބާލިންގެ ގޯލަށް ފޮނުވާލާފައެވެ. ނަމަވެސް މިހާފުގައި އެޓީމުން ފޮނުވާލި ހަމަލާތައް ދިފާއުކުރުމުގައި ހަތާބާލިންގެ ޑެންމާކް ގޯލްކީޕަރު އޮލިވަރ ކްރިސްޓިއަންސަން ވަނީ މޮޅު ކުޅުމެއް ދައްކައިދީފައެވެ.

މެޗުގެ ދެވަނަ ހާފުގައި ބަޔާން މިއުނިކުން ކުރިއަށްޖެހި ލަނޑެއްޖުމަށް ކުރަމުންއައި މަސައްކަތް އެޓީމަށް ކާމިޔާބުވީ ދެވަަނަ ހާފުގެ 69 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޖަރުމަނުގެ ފޯވާޑް  ސާޖް ގްނަބްރީ އެވެ. މިއީ އެޓީމުގެ މިޑްފިލްޑަރު ޖޯޝުއާ ކިމިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުން ބަޔާން މިއުނިކަށް ތިން ޕޮއިންޓް ކަށަވަރުކޮށްދިން ލަނޑު ދެވަނަ ހާފުގެ 79 ވަނަ މިނެޓުގައި ކާމިޔާބުކޮށްދިނީ ފްރާންސްގެ ފޯވާޑް ކިންގްސްލީ ކޯމަން އެވެ. މިއީ ވެސް އެޓީމުގެ ޖަރުމަނު މިޑްފީލްޑަރު ޖޯޝުއާ ކިމިޗް ތަނަވަސްކޮށްދިން ފުރުސަތެއްގައި ކޯމަން ކާމިޔާބުކޮށްދިން ލަނޑެކެވެ. އަދި މިއީ ޓުޗެލް ބަޔާން މިއުނިކާއި ހަވާލުވި ފަހުން އެޓީމު މޮޅުވި ފުރަތަމަ މެޗެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 30 މެޗު ކުޅެގެން ބަޔާން މިއުނިކަށް 62 ޕޮއިންޓް ލިބިފައިވާއިރު، ދެވަނައިގައި އޮތް ބޮރޫޝިއާ ޑޯޓްމަންޑަށް 30 މެޗު ކުޅެގެން ލިބިފައިވަނީ 61 ޕޮއިންޓެވެ. އަދި މިރޭގެ މެޗުން ބަލިވި ހަތާބާލިން 30 މެޗު ކުޅެގެން ލިބުނު 22 ޕޮއިންޓާއެކު އެޓީމު މިވަގުތު އޮތީ 18 ޓީމު ހިމެނޭ ލީގު ތާވަލުގެ ފުލުގައެވެ.