މާލެ ސަރަހައްދުގެ ގޭބީސީތަކުގެ އޭޕްރިލް މަހުގެ ކަރަންޓު ބިލުގެ ތެރޭގައި ކުނި އުކާލުމަށް ވޭސްޓް މެނޭޖުމަންޓު ކޯޕަރޭޝަން (ވެމްކޯ) އިން ނަގާ ފީ ހިމަނާފައި ނުވާނެކަމަށް އެ ކުންފުނިން ބުނެފި އެވެ. 

އޭޕްރިލްމަހުގެ ފުރަތަމަ ދުވަހުން ފެށިގެން ވޭސްޓް މެނޭޖުމަންޓު ކޯޕަރޭޝަންގެ ޚިދުމަތުގެ ބިލާއި ސްޓެލްކޯގެ ކަރަންޓު ބިލުތައް އެއްކޮލާ،  އެޕާޓްމަންޓްތަކަށް އަރައި ކުނި ނަގައި އަގެއްގެ ގޮތުގައި ދުވާލަކަށް 4.93 ރުފިޔާގެ ރޭޓުން ނަގާގޮތަށް ވެމްކޯއިން ވަނީ ކަނޑައަޅައިފަ އެވެ. 

އޭޕްރިލް މަހުގެ ކަރަންޓު ބިލުތައް އާދަޔާ ޚިލާފަށް ބޮޑުވެފައިވާއިރު، ކަރަންޓް ބިލާއި ވެމްކޯ ބިލާއި އެއްކޮށްފައި ވާނެތޯ "ވޮއިސް" އިން ކުރި ސުވާލަކަށް ޖަވާބުދެއްވަމުން ވެމްކޯއިން ބުނީ މި މަހުގައި އެއްވެސް ގޭބީސީއެއްގެ ބިލެއްގައި ވެމްކޯގެ ބިލު ހިމަނާފައި ނުވާނެ ކަމަށެވެ.

އަދި ކަރަންޓުބިލާއި ކުނި ބިލު އެއް ކުރެވުނަސް، ވެމްކޯގެ ބިލު އެނގޭނެހެން ވަކިން ފާހަގަކުރެވިފައިވާނެ ކަމަށް އެ ކުންފުނިން ވަނީ ބުނެފައެވެ. 

ވެމްކޯއިން ގެތަކުން ކުނި ނަގައިދޭ ބިލް ސްޓެލްކޯގެ ކަރަންޓު ބިލުގައި ހިމަނަން އެކުންފުނިން ނިންމާފައިވީ ނަމަވެސް ދެ ބިލު އެއްކޮލައިގެން ދައްކާގޮތަށް ހަމަޖެހިގެންދާނީ މޭ މަހުގައި ކަމަށެވެ. 

މޭ މަހުގެ ބިލު ކަރުދާސް ތައްޔާރުކުރާނީ ކަރަންޓު ބިލާއި ވެމްކޯގެ ކުނި ބިލު އެއްކަރުދާސް ކުރެވިގެންކަމަށް ވެމްކޯއިން ވަނީ ބުނެފަ އެވެ.