ސިއްޙީ ދާއިރާގެ މަސައްކަތް ތެރިންގެ މުސާރަ ބޮޑު ކުރެވި، އެކަން އިއްލާނު ވެގެން ދިޔައިރު ސިއްޙީ ދާއިރާގެ އެންމެ ބުރަ މަސައްކަތެއް ކުރާ ގިނަ ނަރުހުންގެ މުސާރައިގެ ތެރެއިން ސީނިއަރ ރެޖިސްޓާރޑް ނަރުހުންގެ މުސާރައިން 8،800 ރުފިޔާގެ ކުރިއެރުމެއް ލިބިފައިވާ ކަމަށް ހެލްތް މިނިސްޓަރީ އިން އާންމުކޮށްފައިވާ ހިސާބުތަކުން ދައްކައިފިއެވެ.

ސީނިއަރ ރެޖިސްޓާޑް ނަރުހުންގެ ތެރެއިން ރޭންކު 8 ގެ ނަރުހުންގެ ގޮތުގައި ދިވެހި 187 ނަރުހެއް މަަސައްކަތް ކުރެއެވެ. ސަރުކާރުން ސިއްޙީ މަސައްކަތް ތެރިންގެ މުސާރައަށް މިގެނައި ބަދަލުގެ ކުރިން އެ ރޭންކުގެ ސީނިއަރ ރެޖިސްޓާޑް ނަރުހަކަށް އިތުރު ގަޑީގެ އެލަވަންސް އާއި އެކު މުސާރައިގެ ގޮތުގައި ލިބެނީ 20،459ރ އެވެ. ބަދަލުވި މުސާރައާއި އެކު އެނަރުހުންނަށް އިތުރު ގަޑީގެ ފައިސާ ނުލައި 29،271ރ މަހު މުސާރައެއްގެ ގޮތުގައި ލިބޭނެއެވެ. މިއީ، 8,812 ރުފިޔާގެ ކުރިއެރުމެކެވެ.

މީގެ އިތުރުން، ރެޖިސްޓަރޑް ނަރުސް ރޭންކް 7 ގައި 503 ނަރުހުން މަސައްކަތް ކުރާއިރު އެނަރުހުންގެ މުސާރައިން 2،494ރ ވަނީ ބޮޑުވެފައެވެ.

ސިއްޙީ ދާއިރާގައި މަސައްކަތް ކުރާ ދިވެހި، 40 ކްލިނިކަލް ނަރުހުން ތިބި އިރު އެނަރުހުންގެ މުސާރައަށް 13،000ރ ގެ ބޮޑު ކުރިއެރުމެއް ވަނީ ލިބިފައެވެ.

ބަދަލު ކުރެވުނު މުސާރަޔާއި އެކު ނަރުހުންގެ ތެރެއިން އެންމެ ކުޑަ ކޮށް މުސާރައިން ބޮޑު ވެފައިވަނީ ރެޖިސްޓާޑް ނަރުސް ރޭންކް 5ގެ ނަރުހުންނަށެވެ. އެނަރުހުންގެ މުސާރައިން ބޮޑުވެފައިވަނީ 983ރ އެވެ. އެ ކެޓަގަރީގައި 874 ނަރުހުން މަސައްކަތް ކުރެއެވެ.

އެންރޯލްޑް ނަރުހުންގެ ގޮތުގައި މަސައްކަތް ކުރާ 300 ނަރުހުން ތިބި އިރު އެނަރުހުންގެ މުސާރައިން 1،200 ރުފިޔާ ވަނީ ބޮޑުވެފައެވެ.

ސިއްޙީ ދާއިރާގެ މަސައްކަތް ތެރިންގެ މުސާރައަށް ގެނެވުނު ބަދަލު ތަކާއި އެކު އެއްބަޔަކު ދަނީ މިބަދަލު ތަކަކީ ކަމުނުދާ ގޮތަކަށް ގެނެވިފައިވަ ބަދަލު ތަކެއް ކަމަށް ބުނެ ފާޑު ކިޔަމުންނެވެ. އަނެއް ބަޔަކު ދަނީ މިބަދަލުތަކަށް މަރުހަބާ ކިޔައި ސަރުކާރަށް މަރުހަބާ ކިޔަމުންނެވެ.