ސިޔާދަތުގެ ދައުވާކުރުމަށް ވަކާލާތުކުރައްވާ ބޭފުޅުންނަށް މިހާރު އެކަމުގައި އޮތް އެންމެ ބޮޑު ހުރަހެެއްކަމަށް ފެންނަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮންނާނެކަން ޤަބޫލުކުރެއްވައި ފޮނުއްވި ސިޓީ ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.
ޗާގޮސްއާއި ރާއްޖޭގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމަށް އިންޓަނޭޝަނަލް ޓްރައިބިއުނަލް އޮން ދަ ލޯ އޮފް ދަ ސީސް (އިޓްލޮސް)ގައި ނިންމި ނިންމުމަށްފަހު ސަރުކާރުން ބޭއްވި ނޫސްވެރިންގެ ބައްދަލުވުމުގައި ޚާރިޖީވަޒީރު ޢަބްދުالله ޝާހިދު ވަނީ ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮންނާނެކަމާމެދު އިންޓަނޭޝަން ކޯޓް އޮފް ޖަސްޓިސްގެ އެޑްވައިޒަރީ އޮޕީނިއަނަކަށް މޮރިޝަސްއިން އެދުމުން، އޭގެ މުޤާބިލުގައި ރާއްޖެއިން އެއްވެސް ކަމެއް ނުކުރުމާއެކު 2016 ވަނަ އަހަރުގައި، ޗާގޮސްގެ މައްޗަށް ރާއްޖޭގެ ސިޔާދަތު އޮންނާނެކަމަށް ދައުވާކުރުމުގެ ފަހު ފުރުސަތު ގެއްލިފައިވާ ކަމަށް ވިދާޅުވެފައެވެ.
އެކަމާއި ގުޅިގެން ދިޔާނާ ކުރެއްވި ޓުވީޓެއްގައި ވިދާޅުވީ، ޝާހިދު އެފަދައި ވިދާޅުވި ނަމަވެސް އެއީ ރަނގަޅު ވާހަކައެއް ނޫން ކަމަށެވެ. އަދި އިންޓަނޭޝަނަލް ކޯޓު އޮފް ޖަސްޓިސް (އައިސީޖީ)ގެ ނެރުއްވި އިޝްތިޝާރީ ލަފަޔަކީ ޚުޞޫމަތެެއް ފައިސަލާކޮށް ބަނދެވޭގޮތަށް އޮތް އާޚިރު ނިންމުމެއް ނޫން ކަމަށްވެސް ދިޔާނާ ވިދާޅުވިއެވެ.
ދިޔާނާ ވިދާޅުވީ ސިޔާދަތުގެ ދައުވާކުރުމަށް ވަކާލާތުކުރައްވާ ބޭފުޅުންނަށް މިހާރު އެކަމުގައި އޮތް އެންމެ ބޮޑު ހުރަހެެއްކަމަށް ފެންނަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ފޮނުއްވި ސިޓީފުޅު ކަމަށެވެ.
"ބުނެވުނު ކްލެއިމް ކުރަން ވަކާލާތުކުރާ ބޭފުޅުންނަށް އޮތް އެންމެ ބޮޑު ހުރަހެއް ކަމަށް ފެންނަނީ ޗާގޯސްގެ ސިޔާދަތު ގަބޫލުފުޅު ކުރައްވައި ރައީސް ފޮނުއްވި ސިޓީ ފުޅު. ސަބަބަކީ ބައުންޑަރީ (އިމުގެ) ޑިސްޕިއުޓް (ފުށުއެރުންތައްް) ތައް ފައިސަލާ ކުރެއްވުމުގައި އައިސީޖީ އިން ގައުމުތަކުގެ އިރާދަ (ވިލް) އަށް ރިޢާޔަތްކޮށް ބުރަދަން ދޭތީ." ދިޔާނާ ވިދާޅުވިއެވެ.
މިއާއެކު ދިޔާނާ ވިދާޅުވީ ރައީސްގެ ސިޓީފުޅަކީ އިމުގެ މައްސަލާގައި ދިވެހި ދައުލަތުގެ އިރާދާކަމަށް ނިމިއްޖެނަމަ، ޗާގޯސްގެ ސިޔާދަތަށް ދައުވާ ކުރުމަށް ހުރަހަކަށްވާނެ ކަމަށެވެ.
އެހެންކަމުން، އެ ސިޓީއަކީ ވަގުތު ނުޖެހެނީސް ފޮނުއްވަން ޖެހޭ ހާލަތެއް ނެތި ފޮނުއްވި ސިޓީއެއް ނުވަތަ ޕްރިމެޗުއާ ސިޓީއެއް ކަމުގައި ދެކެވަޑައިގަންނަވާ ކަމަށް ދިޔާނާ ވިދާޅުވިއެވެ.
އަދި އަމުދުން ރައްޔިތުންގެ މަޖިލީހާއެކު ފުޅާ ދާއިރާއެއްގައި މަޝްވަރާނުކުރައްވައި އެ ސިޓީ ފޮނުއްވުމަކީ ވަރަށް ދެރަކަމެއް ކަމުގައިވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
