ބްރިޖު ހަދާ ބާޖެއް ފަރަށް އެރި ކަމަށް ބުނެ މީސް މީޑިއާގައި ފެތުރެމުންދާ ވާހަކަތައް، އެ މަޝްރޫއުގެ މަސައްކަތް ކުރަމުންދާ އެފްކޮންސް އިން ދޮގު ކޮށްފި އެވެ.
ރޭ 23:00 ކަންހާއިރު ބުރިޖުގެ މަސައްކަތުގައި ބޭނުން ކުރާ ބާޖެއް ވިލިމާލޭ ފަރަށް އަރާފައިވާ ކަމަށާ، އެ އުޅަނދު ފަރަށް އަރައިގެން ގޮސް ވިލިމާލެ އާއި ދާދި ގާތައް ދިޔައިރު ވެސް އުޅަނދު ފަރު މަތިން ނަގަން ނުވަތަ އިތުރަށް ފަރަށް އެރިޔަ ނުދޭން އެއްވެސް ބަޔަކު މަސައްކަތް ކުރި މަންޒަރު ނުފެންނަ ކަމަށް މީސް މީޑިއާގައި ވާހަކަތައް ވަނީ ފެތުރިފައެވެ.
އެކަމާ ގުޅިގެން "ވޮއިސް" އިން ސުވާލު ކުރުމުން ތިލަމާލެ ބްރިޖް ޕްރޮޖެކްޓް މެނޭޖަރު މުހައްމަދު ޖިނާން ވިދާޅުވީ، އެ ބާޖު ވިލިމާލެ ފަރަށް ނާރާކަމަށާ، ބާޖުގެ ނަގިލި ކަހާލީ ކަމަށެވެ.
އަދި ނަގިލި ކަހާލިތާ ކުޑަ ވަގުތު ކޮޅެއްގެ ތެރޭގައި ކޮންޓްރޯލް ކޮށްފައިވާ ކަމަށާ އޭގެ ސަބަބުން ބާޖަށްވެސް އެއްވެސް ގެއްލުމެއް ނުވާ ކަމަށް އޭނާ ވިދާޅުވި އެވެ.
"ބާޖު ފަރަކަށް ނާރާ. ނަގިލި ކަހާލީ. އެފަދަ މަސައްކަތްތައް ކުރާ އިރު ނަގިލި ކަހާލުމަކީ އާއްމު ކަމެއް. އީޕީއޭ އަދި ޕްލޭނިންގ މިނިސްޓްރީގެ ޑައިވަރުންވެސް އެ ސަރަހައްދުގައި ޑައިވް ކޮށް، އެ ސަރަހައްދު ބަލާފައި ވަނީ. އެ ފަރާތުންވެސް ވިދާޅުވީ ފަރަށް އެއްވެސް ގެއްލުމެއް ނުވާ ކަމަށް." ޖިނާން ވިދާޅުވިއެވެ.
މިދިޔަ އަހަރުގެ އޮގަސްޓް މަހު ބުރިޖުގެ މަސައްކަތުގައި ބޭނުން ކުރާ ޕްލެޓްފޯމް އެއް ވިލިމާލޭ ފަރަށް އެރުމުން ބޮޑެތި ގެއްލުންތަކެއް ވަނީ ފަރަށް ލިބިފައެވެ. އެފްކޮންސް އަށް އެއުޅަނދު ފަރު މަތިން ނެގުނީ ދެހަފްތާ ދުވަހުގެ މަސައްކަތުންނެވެ.
Advertisement
This content is created and paid for by advertisers and does not involve Voice Journalists
