މޯލްޑިވްސް ރިފޯމް މޫވްމެންޓް (އެމްއާރްއެމް) އާއި މޮލްޑިވްސް ޑިމޮކްރެޓިކް ޕާޓީ (އެމްޑީޕީ) ކޯލިޝަން އާއި ދެމެދު މަޝްވަރާ ބައްދަލުވުމެއް ބާއްވައިފިއެވެ.

ރޭ އެމްއާރްއެމްގެ އޮފީހުގައި ބޭއްވުނު ބައްދަލުވުމުގައި ދެޕާޓީގެ ދެމެދުގައި ގިނަ ކަންތައްތަކަކާއި މެދު މަޝްވަރާ ކުރެވިފައިވެއެވެ.

އެގޮތުން ރާއްޖޭގެ މިނިވަންކަމާއި ސިޔާދަތާއި އަދި އިސްތިޤުލާލަށް ކިތަންމެ ކުޑަނަމަވެސް އުނިކަމެއް ނާންނާނެކަން ކަށަވަރު ކުރުމަށްޓަކައި މަޢުލޫމާތަށް އެދެވޭނެ ކަމާއިމެދު މަޝްވަރާ ކުރެވިފައި ވާކަމަށް އެމްއާރްއެމް އިން ހާމަކޮށްފައި ވެއެވެ.

ދެވަނަ ކަމަކަށް ދިވެހި ރައްޔިތުންގެ މަސްލަޙަތާއި އެމް.އާރް.އެމްގެ އުޞޫލުތައް ނެގެހެއްޓޭ ގޮތަށް ސަރުކާރު ހިންގޭނެކަން ކަށަވަރު ކުރުމާއި މެދު މަޝްވަރާ ކުރެވުނު ކަމަށް އެމްއާރްއެމް އިން ހާމަކޮށްފައިވެއެވެ.

އަދި ކޯލިޝަން އެއްބަސްވުމަށް އިޙްތިރާމުކޮށް އެއްބަސްވުމާއި އެއްގޮތަށް ދެފަރާތުން ވެސް ޢަމަލު ކުރާނެކަމުގެ ޔަޤީންކަން ދިވެހި ރައްޔިތުންނަށް ހޯދައި ދެވޭނެ ގޮތެއް ހޯދުމާއި ބެހޭ ގޮތުންނާއި، ސަރުކާރުގެ ސިޔާސަތުތަކާއި ޤައުމަށް ދިމާވެފައިހުރި ބޮޑެތި ގޮންޖެހުންތައް ރިފޯމް ކުރާނެ ގޮތްތަކާއި މެދުވެސް މަޝްވަރާ ކޮށްފައި ވާ ކަމަށް އެޕާޓީ އިން ބުނެފައިވެއެވެ.

މީގެ އިތުރުން ދިވެހިރާއްޖޭގެ ވެރިކަން ކުރާ ނިޒާމަކީ ރިޔާސީ ނިޒާމުގެ ގޮތުގައި ދަމަހައްޓާނެ ކަމުގެ ޔަޤީންކަން ދެމެހެއްޓުމާއި މެދުވެސް އެމްއާރްއެމް އާއި އެމްޑީޕީ ކޯލިޝަނުން ވާހަކަ ދައްކައިފައިވާ ކަމަށް އެމްއާރްއެމް އިން ބުނެފައިވެއެވެ.

އަދި މަތީގައި ފާހަގަ ކުރެވުނު ކަންތައްތަކާއި މެދު، އިތުރު ސިޔާސަތުތަކާއެކު ތަފްސީލީ މަޝްވަރާ ބައްދަލުވުންތަކެއް ކުރިއަށް ގެންދިޔުމަށް ވެސް ނިންމާފައިވާ ކަމަށް އެމްއާރްއެމް އިން ހާމަކޮށްފައިވެއެވެ.

އެމްއާރްއެމް އަކީ މިހާރު މިހިނގާ ސަރުކާރުގެ ކޯލިޝަންގައި ހިމެނޭ ޕާޓީއެކެވެ. އަދި މިހާތަނަށްވެސް ކޯލިޝަންގައި ދެމި އޮތް ޕާޓީ އެކެވެ.

ނަމަވެސް މިއަހަރުގެ ސެޕްޓެމްބަރުގައި ބޭއްވުމަށް ހަމަޖެހިފައިވާ އިންތިޚާބުގައި އެމްޑީޕީ ކޯލިޝަން ގައި އެމްއާރްއެމް އިން އަދި ބައިވެރިވެފައެއް ނުވެއެވެ.  އަދި އެހެން ޕާޓީ އަކާއިވެސް އަދި މިނިވަން ކެނޑިޑޭޓަކާއި އެކުވެސް ކޯލިޝަނަކަށް ދިއުމަކަށް އެޕާޓީ އިން ނިންމާފައެއް ނުވެއެވެ.

އަދި އިންތިޚާބުގައި އެޕާޓީއިން ތާއީދު ކުރާނެ ކެނޑިޑޭޓެއް ނުވަތަ އެޕާޓީ އިން ނެރޭނެ ކެނޑިޑޭޓެއްވެސް އިއުލާނު ކޮށްފައެއް ނުވެއެވެ.