ގައުމީ ފުޓްބޯޅަ މުބާރާތުގެ ފައިނަލުގައި 2-0 ގެ ނަތީޖާއަކުން ކުލަބު އީގަލްސް ބަލިކޮށް މުބާރާތުގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ހޯދައިފިއެވެ.

ވަރަގަދަ ސްކޮޑަކާއި އެކު މިއަހަރުގެ ސީޒަނަށް ދުރާލާ ތައްޔާރުވި މާޒިޔާ އިން، މި ސީޒަނުގެ ދެވަަނަ ތަށި ކާމިޔާބުކުރި އިރު، ސީޒަނުގެ ފުރަތަމަ ތަށި ޗެރިޓީ ޝީލްޑް އެޓީމުން ކާމިޔާބުކުރީ ވެސް ކުލަބް އީގަލްސް ބަލިކުރުމަށް ފަހުގައެވެ.

ގަލޮޅު ދަނޑުގައި މިރޭކުޅެވުނު ފައިނަލް މެޗުގެ ފުރަތަަމަ ހާފުގެ 45 ވަނަ މިނެޓުގައި މާޒިޔާއަށް ލީޑު ނަގައިދިނީ އެޓީމުގެ އިބްރާހިމް އައިސަމް އެވެ. އަދި މި މެޗުގައި އެޓީމުން ކާމިޔާބުކުރި ދެވަނަ ލަނޑު ދެވަނަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ ވެސް އައިސަމްއެވެ.

މިރޭގެ މެޗުން މޮޅުވެ ގައުމީ މުބާރާތުގެ ޗެމްޕިއަންކަން މާޒިޔާ ހޯދިއިރު، މިއީ މި މުބާރާތުގެ ޗެމްޕިއަންކަން އެޓީމު ހޯދި ދެވަނަ ފަހަރެވެ. 2015 ވަނަ އަހަރު ގައުމީ މުބާރާތުގެ ޗެމްޕިއަންކަން އެޓީމުން ފުރަތަމަ ފަހަރަށް ހޯދިއިރު، މިއަހަރުގެ މުބާރާތުގެ ގްރޫޕް ސްޓޭޖުގައި ފުރަތަަމަ ޑިވިޝަނުގެ އަލަށް ވާދަކުރަމުން އަންނަ ބުރު އަތުން އެޓީމު ވަނީ ބަލިވެފައެވެ.

1997 ވަނަ އަހަރާއި 2013 ވަނަ އަހަރު ރާއްޖޭގެ ފުޓްބޯޅަ ސީޒަނުގައި ކުޅެވުނު ހުރިހާ މުބާރާތެއް ނިއު ރޭޑިއަންޓް ސްޕޯޓްސް ކްލަބުން ކާމިޔާބުކޮށްފައިވާއިރު، މިއަހަރުގެ ދިވެހި ލީގު މާޒިޔާ އިން ކާމިޔާބުކޮށްފި ނަމަ ނިއުރޭޑިއަންޓް ސްޕޯޓްސް ކްލަބްގެ ރެކޯޑާއި އަރާ ހަމަކުރުމުގެ ފުރުސަތު އެޓީމަށް ލިބިގެންދާނެއެވެ.

ނަމަވެސް 2013 ވަނަ އަހަރު ސީޒަނުގައި ކުޅުނު ލޯކަލް ހުރިހާ މެޗެއް ކާމިޔާބުކޮށްގެ ނިއުރޭޑިއަންޓް އިން ގާއިމުކޮށްފައިވާ 100 ޕަސެންޓް މޮޅުވުމުގެ ރެކޯޑާއި އަރާ ހަމަކުރުމުގެ ފުރުސަތު މާޒިޔާއަށް މިހާރު ވަނީ ގެއްލިފައެވެ.