ސްޕެނިޝް ލަލީގާގައި މިރޭ އަމިއްލަ ދަނޑުގައި 1-0 ގެ ނަތީޖާއަކުން އޮސަސޫނާ ބަލިކޮށް، ބާސެލޯނާ އިން ލީގު ތާވަލުގެ ކުރީގައި 14 ޕޮއިންޓްގެ ލީޑެއް ނަގައިފި އެވެ.

ބާސެލޯނާގެ ދަނޑުގައި މިރޭ ކުޅެވުނު މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އެޓީމުން މެޗު ޑޮމިނޭޓުކުރި ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް އިދިކޮޅު ޓީމުގެ ގޯލާއި އަމާޒުކޮށް ނުރައްކާތެރި ހަމަލާއެއް ފޮނުވާލެވިފައި ނުވެއެވެ.

މިރޭގެ މެޗުގެ ފުރަތަަމަ ހާފުގެ 26 ވަނަ މިނެޓުގައި އޮސަސޫނާގެ ޑިފެންޑަރު ޖޯޖް ހެރާންޑޯ ކުރި ނުރައްކާތެރި ފައުލަކާ ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

ދެވަަނަ ހާފްގައި އެއްކުޅުތެރިއަކު މަދުކޮށް ކުޅެމުންދިޔަ އޮސަސޫނާ އިން ބާސެލޯނާގެ އެޓޭކްތައް ހުއްޓުވުމުގައި ރަގަޅު ޑިފެންސިވް ކުޅުމެއް ދެއްކި އިރު، ދެވަަނަ ހާފުގެ 79 ވަނަ މިނެޓުގައި ބާސެލޯނާގެ ފޯވާޑް ރޮބަޓް ލެވަންޑޮވްސްކީ އެޓީމަށް ލަނޑެއް ކާމިޔާބުކޮށްދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިރޭގެ މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 85 ވަނަ މިނެޓުގައި ބާސެލޯނާއަށް ކާމިޔާބުކޮށްދިނީ އެޓީމުގެ ޑިފެންޑަރު ޖޯޑީ އަލްބާ އެވެ. މިއީ އެޓީމުގެ ނެދަލޭންޑްސް މިޑްފީލްޑަރު ފްރެންކީ ޑި ޖޮންގް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 33 މެޗު ކުޅެގެން ބާސެލޯނާއަށް 82 ޕޮއިންޓް ލިބިފައިވާއިރު، ދެވަނައިގައި އޮތް ރެއާލް މެޑްރިޑް ލިބިފައިވަނީ 68 ޕޮއިންޓެވެ. އަދި މި ދެޓީމުގެ މެދުގައި 14 ޕޮއިންޓްގެ ފަރަގެއް އެބައޮތެވެ.

މިރޭގެ މެޗުން ބަލިވި އޮސަސޫނާއަށް 33 މެޗުން 44 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 9 ވަނައިގައެވެ. އަދި ލީގުގައި ކޮންމެ ޓީމަކަށް ބާކީ ފަސް މެޗު އޮތްއިރު، ލީގު ޗެމްޕިއަންކަން ކަށަވަރުކުރުމަށް ބާސެލޯނާއަށް މިހާރު ބޭނުންވަނީ ބާކީ އޮތް ފަސް މެޗުން 2 ޕޮއިންޓެވެ.