ފޯޅަވަހި މައްސަލައިގައި އިދިކޮޅު ސިޔާސީ ފަރާތްތަކުން ދައްކަމުންދާ ވާހަކަތަކަކީ ޤާނޫނީ އެެއްވެދް ބުރަދަނެެއް ހުރި ވާހަކަތަކެއް ނޫން ކަމަށް ޢަދާލަތު ޕާޓީ އިން ބުނެފިއެވެ.

އެޕާޓީ އިން މިހެން ބުނީ ދިވެހި ރާއްޖެއާއި މޮރިޝަސްގެ ކަނޑުގެ ސަރަޙައްދުގެ އިންވަކިކުރުމާ ގުޅިގެން ނެރުނު ބަޔާނެއްގައެވެ. އެބަޔާނުގައި އެ ޕާޓީ އިން ބުނެފައިވަނީ މި ނިންމުމަކީ، ރާއްޖޭގެ ޚާއްޞަ އިޤްތިޞާދީ ސަރަޙައްދު ކަށަވަރު ކުރެވި، ދިވެހި މަސް ކަނޑުތަކާއި ރާއްޖޭގެ ޚާއްޞަ އިޤްތިޞާދީ ސަރަޙައްދު ޙިމާޔަތްކުރުމަށް އެޅިގެންދިޔަ މުހިންމު ފިޔަވަޅެއް ކަމުގައި އެ ޕާޓީއިން ދެކޭކަމަށެވެ.

އަދި ދިވެހި ރާއްޖެއާއި މޮރިޝަސްގެ ކަނޑުގެ ސަރަޙައްދުގެ އިންވަކިކުރުމާ ބޭހޭގޮތުން އިންޓަރނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހެޅުނު މައްސަލައިގައި، ދިވެހިރާއްޖޭގެ ސަރުކާރުން ވަކާލާތު ކުރި ގޮތަށް އެ ޓްރައިބިއުނަލް އިން ނިންމުމާ ވިދިގެން ދިވެހިރާއްޖޭގެ ރައީސުލް ޖުމްހޫރިއްޔާއަށާއި ދިވެހި ރައްޔިތުންނަށް އެ ބަޔާނުގައި މަރުހަބާ ކިޔައިފައިވެއެވެ.

"މި ނިންމުމާ ވިދިގެން އިދިކޮޅު ސިޔާސީ ފަރާތްތަކުން ދައްކަމުން ދާ ވާހަކަތަކީ ޤާނޫނީ އެއްވެސް ބުރަދަނެއް ހުރި ވާހަކަތަކެއް ކަމުގައި މި ޕާޓީއިން ނުދެކެން" ޢަދާލަތު ޕާޓީގެ ބަޔާނުގައި ވެއެވެ.

ފޯޅަވަހީގެ މައްޗަށް މޮރިޝަސް ގެ ސިޔާދަތީ ބާރު އޮތްކަމަށް ބުނެ އިންޓަރނޭޝަނަލް ކޯޓް އޮފް ޖަސްޓިސްއިން ނެރުނު އިސްތިޝާރީ ލަފާގެ މައްސަލަ އަލުން އ.ދ އަށް ހުށަހެޅިއްޖެނަމަ، ސަރަޙައްދާބެހޭގޮތުން ރާއްޖެއިން ކުރާ ދަޢުވާ ދޫކޮށްނުލައި, މޮރިޝަސް އަށް ތާއީދު ކުރައްވާނެކަމަށް, ރައީސުލް ޖުމްހޫރިއްޔާ ވިދާޅުވުމަކީ، ދިވެހިރާއްޖޭގެ ސަރަޙައްދުން ބައެއް ދޫކޮށްލަން އެއްބަސްވެލެއްވުން ކަމަށް ބުނުމަކީ ޙަޤީޤަތާ ޚިލާފު ބުނުމެއް ކަމަށް ޢަދާލަތު ޕާޓީގެ ބަޔާނުގައި ވެއެވެ.

އެ ޕާޓީގެ ބަޔާނުގައި ވަނީ  އިޓްލޮސް އިން ބަލަމުން އައި އައި މައްސަލައިގައި، މޮރިޝަސްގެ ސިޔާދަތީ ބާރު ފޯޅަވަހީގެ މައްޗަށް ހިނގުމާމެދު ދިވެހިރާއްޖެއިން އުފެއްދި ސުވާލަށް، އޭގެކުރިން ޓްރައިބިއުނަލްއިން ގޮތެއް ކަނޑައަޅުއްވާފައި ވާކަމަށެވެ.

"އަދިހަމަ އެހެންމެ، ޤާނޫނު އަސާސީގެ 3 ވަނަ މާއްދާއާ ޙަވާލާދެއްވާ, ދިވެހިރާއްޖޭގެ ސަރަޙައްދަށް ބަދަލު ގެނައުމަށް ރައީސުލް ޖުމްހޫރިއްޔާ ނިންމެވިކަމަށް ވިދާޅުވެ ދައްކަވާ ވާހަކައަކީވެސް ރަނގަޅު ވާހަކައެއް ކަމުގައި މި ޕާޓީއިން ނުދެކެން" ޢަދާލަތު ޕާޓީގެ ބަޔާނުގައި ވެއެވެ.

މީގެ އިތުރަށް އެބަޔަާނުގައި ވަނީ ޤާނޫނު އަސާސީގެ 3 ވަނަ މާއްދާގައި ބަޔާންކުރާ ދިވެހިރާއްޖޭގެ ސަރަޙައްދު ކަމުގައި ބެލެވޭނީ ދިވެހިރާއްޖޭގެ ބޭސްލައިން އިން ފެށިގެން 12 ނޯޓިކަލް މައިލް ހިމެނޭ ސަރަޙައްދަށް ކަމަށެވެ. އަދި ފޯޅަވަހީގެ މައްޗަށް މޮރިޝަސްގެ ސިޔާދަތީ ބާރު އޮތްކަމަށް ރާއްޖެއިން ޤަބޫލުކުރަން ނިންމުމަކީ ޤާނޫނު އަސާސީގައި ބަޔާންކުރާ ދިވެހިރާއްޖޭގެ ސަރަޙައްދުން ބައެއް ދޫކޮށްލަން ރާއްޖެއިން ނިންމެވި ނިންމުމެއް ނޫން ކަމަށެވެ.

ޢަދާލަތުން ބުނީ ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދަކީ އާންމު އުޞޫލުން ބަލާނަމަ، ދެންނެވުނު ބޭސްލައިން އިން ފެށިގެން 200 ނޯޓިކަލް މޭލަށް ދަމައިލެވޭ ސަރަޙައްދެއް ކަމަށް ވިއަސް، އުތުރާއި ދެކުނުގައި ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދާ ފުށުއަރާ އެހެނިހެން ސިޔާދަތީ ބާރުތަށް އޮތުމުން މި ސަރަޙައްދުތަކުގައި ވަނީ އިތުރަށް އިން ކުރެވިފައި ކަމަށެވެ.

އެގޮތުން އިންޑިޔާ އާއި ސްރީލަންކާ އާއި ދިވެހިރާއްޖެއާ ދެމެދު 1976 ވަނަ އަހަރު އުތުރުގެ އިޤްތިޞާދީ ސަރަޙައްދާ މެދު އެއްބަސްވުމަކަށް އާދެވިފައި ވާކަމަށެވެ.  ނަމަވެސް 1968 ވަނަ އަހަރުން ފެށިގެން އިނގިރޭސިންގެ އަތްދަށުގައި އޮތް ފޯޅަވައްސާ ރާއްޖެއާ ދެމެދު އޮތް ސަރަޙައްދުގައި ދެޤައުމުގެ އިން ރަސްމީކޮށް ކަނޑައެޅިފައެއް ނެތް ކަމަށާއި، ރަސްމީކޮށް އިން ކަނޑައެޅިގެން ދިއުމަކީ ރާއްޖޭގެ ދެކުނުގެ ސަރަޙައްދުން ދިވެހިރާއްޖޭގެ ޙައްޤު އިތުރަށް ކަށަވަރު ކުރެވި ޤުދުރަތީ ވަސީލަތްތަށް ޙިމާޔަތްކޮށް ދިވެހިންނަށް ޚާއްޞަކޮށް އޭގެ މަންފާ ހޯދުމަށް ލިބިގެންދިޔަ އިތުރު ބާރެއް ކަމަށް ޢަދާލަތުން ބުނެފައިވެއެވެ.

އަދި ކުރިން ބަޔާންކުރެވުނުް ކަންކަމަށް ރިޢާޔަތްކުރާއިރު، ދިވެހިރާއްޖެ އާއި މޮރިޝަސް އާ ދެމެދު އުފެދިފައިވާ ޚިލާފުގައި ދިވެހި ސަރުކާރުން ގެންގުޅުއްވި ހަމަތަކަކީ ދިވެހިރާއްޖޭގެ ޤާނޫނުތަކާއި ފުށުއަރާ ހަމަތަކެއް ނޫން ކަމާއި، މި ކަމުގެ ސަބަބުން ދިވެހިރާއްޖޭގެ އިޤްތިޞާދީ ސަރަޙައްދަށް ބައިނަލްއަޤްވާމީ ޤާނޫނުން ކަށަވަރުކަމާއި ރައްކާތެރިކަން ލިބިގެން ދިޔަ ދިޔުމަކީ ދިވެހިރާއްޖެއަށް ލިބުނު ބޮޑު ކާމިޔާބީއެއް ކަމުގައި ދެކޭ ކަމަށް ޢަދާލަތު ޕާޓީއިން ބުނެފައިވެއެވެ.