ދެން ކޮންމެ ގެއަކަށް ރަން ފައްޓަރެއް ދިނަސް ސަރަޙައްދު ވިއްކި މީހާ އިންތިޚާބު ނުކުރާނެ ކަމަށް ކުރީގެ ނައިބު ރައީސް ޑރ މުހައްމަދް ޖަމީލް އަޙްމަދު ވިދާޅުވެއްޖެއެވެ.

ޑރ ޖަމީލް މިހެން ވިދާޅުވީ އޭނާ މިއަދި ކުރެއްވެވި ޓްވީޓެއްގައެވެ.

ޑރ ޖަމީލްގެ ޓްވީޓުގައި ވިދާޅުވެފައިވަނީ ފޯޅަވަހި މައްސަލާގައި ރާއްޖޭގެ ރައްޔިތުން ތިބިގޮތް މިއަދު ކުރީގެބަންޑާރަ  ނާއިބުންނާއި ސިޔާސީ ޕާޓީތަކުގެ ޕްރެސްއިން ވަރަށް ސާފު ކަމަށެވެ. އަދި އެންމެން ތިބީ ރައީސް އިބްރާހިމް މުޙައްމަދު ޞާލިޙާއި ދެކޮޅަށް ކަަމަށެވެ. އަދި މިވެރިކަން ނިމިއްޖެ ކަަމަށްވެސް ޑރ ޖަމީލްގެ ޓްވީޓުގައި ވިދާޅުވެފައި ވެއެވެ.

ފޯޅަވަހީގެ މައްސަލައިގައި މިއަދު ކުރީގެ ދެ ބަންޑާރަ ނައިބުން ކަމަށްވާ ޑރ މުހައްމަދު މުނައްވަރާއި އަލްއުސްތާޒާ ޢާއިޝަތު ޢާޒިމާ ޝުކޫރުގެ އިތުރުން ކުރީގެ ބައެއް މިނިސްޓަރުންގެ އިތުރުން ސިޔާސީ ޕާޓީ ތަކުން ބައިވެރިވެފައި ވެއެވެ.

މޮރިޝަސް އާއި ރާއްޖޭގެ ކަނޑުގެ ސަރަހައްދުގެ ފުށުއަރާ ކަމަށްބުނާ ބައި ބެހުމުގެ މައްސަލައިގައި އިޓްލޮސް އިން ވަނީ މިދިޔަ ހުކުރުދުވަހު ގޮތެއް ނިންމައިފައެވެ.

އެގޮތުންއިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.

މި މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅުމަށެވެ. ނަމަވެސް ރާއްޖެއިން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންއެޅުމަށެވެ.ދެ ފަރާތުގެ ދައުވާތަކާއި ދިފާއީ ވާހަކަތައް އަޑު އެހުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.

އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.