އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި 1-0 ގެ ނަތީޖާއަކުން ފުލަމް ބަލިކޮށް ލިވަޕޫލުން ލީގު ތާވަލުގެ ފަސްވަނައިގައި ހަމަޖެހިލައިފި އެވެ.

ރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި އެންމެ ހުސް ފުރުސަތެއް ލިބުނީ ލިވަޕޫލްގެ ސަލާހް އަށެވެ. ނަމަވެސް އޭނާ ފޮނުވާލި ބޯޅަ ދިޔައީ ގޯލާއި އަމާޒުނުވެ ހުރަސް ދަނޑިމަތިން ބޭރަށެވެ.

މި މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 39 ވަނަ މިނެޓުގައި ލިވަޕޫލަށް ލިބުނު ޕެނަލްޓީއަކުން ކާމިޔާބުކޮށްދީ މުހައްމަދު ސަލާހް އެވެ. މިއީ ފުލަމްގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ލިވިޕޫލުގެ ކުޅުންތެރިޔަކަށް ކުރި ފައުލަކާއި ގުޅިގެން ރެފްރީ ދިން ޕެނަލްޓީއެކެވެ. މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.

Advertisement

ދެވަަނަ ހާފްގައި ފުލަމް އިން ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި އެވެ. މިގޮތުން ދެވަަނަ ހާފުގެ 78 ވަނަ މިނެޓުގައި ނަތީޖާ ހަމަހަމަ ކުރުމަށް އެޓީމުގެ ކާލޯސް ވިނީޝިއަސްއަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ލިވިޕޫލުގެ ގޯލްކީޕަރު އެލިސަން ވަނީ ހުޝިޔާރުކަމާއެކު ދިފާއުކޮށްފައެވެ.

މީގެ އިތުރުން ވެސް ދެވަނަ ހާފުގެ އިތުރު ވަގުތުގައި ފުލަމްގެ ބޮބީ ރެއިޑްއަށް ވަނީ މެޗުގެ ނަތީޖާ އެއްވަރު ކުރުމަށް ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ. ލިވިޕޫލުގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ހުރަސް ދަނޑިމަތިން ބޭރަށެވެ.

ރޭގެ މެޗުން ލިބުނު ތިން ޕޮއިންޓާއެކު 34 މެޗު ކުޅެގެން ލިވަޕޫލަށް 59 ޕޮއިންޓް ލިބިފައިވާއިރު، 6 ވަނައިގައި އޮތް ޓޮޓެންހަމްއަށް 34 މެޗު ކުޅެގެން ލިބިފައިވަނީ 54 ޕޮއިންޓެވެ. އަދި ރޭގެ މެޗުން ބަލިވި ފުލަމްއަށް 34 މެޗުން ލިބުނު 45 ޕޮއިންޓާއެކު އެޓީމު މިވަގުތު އޮތީ ޕްރެމިއާ ލީގު ތާވަލުގެ 10 ވަނައިގައެވެ.