އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި ވެސްޓްހަމް 3-0 ގެ ނަތީޖާއަކުން ބަލިކޮށް، މެންޗެސްޓާ ސިޓީ އިން ލީގުގެ އެއްވަނަ މަގާމަށް ކުރިއަށް ޖެހިލައިފިއެވެ.

ރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ މެންޗެސްޓާ ސިޓީއެވެ. ނަމަވެސް މިހާފުގައި އެޓީމަށް ލިބުނު ފުރުސަތުގައި ލަނޑެއް ކާމިޔާބު ކުރެވޭގޮތެއް ނުވިއެވެ. ފުރަތަަމަ ހާފުގައި ސިޓީ އިން އެންމެ ހުސް ފުރުސަތެއް ލިބުނީ  30 ވަނަ މިނެޓުގައި ޖެކް ގްރިލިޝްއަށެވެ. ނަމަވެސް އޭނާ ފޮނުވާލި ހަމަލާ ވެސްޓްހަމްގެ ގޯލްކީޕަރު ވަނީ ދިފާއުކޮށްފަ އެވެ. އަދި އޭގެ ދެ މިނެޓު ފަހުން އެޓީމުގެ ސްޕެނިޝް މިޑްފީލްޑަރު ރޮޑްރީ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.

މެޗުގެ ދެވަަނަ ހާފު ފެށިގެން ފަސް ވަނަ މިނެޓުގައި މެންޗެސްޓާ ސިޓީއަށް ލީޑު ނަގައިދިނީ އެޓީމުގެ ނެދަލޭންޑްސްގެ ޑިފެންޑަރު ނޭތަން އޭކުއެވެ. މިއީ އެޓީމުގެ އަލްޖީރިއާ ފޯވާޑް ރިޔާދު މަހްރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

Advertisement

ސިޓީގެ ދެވަަނަ ލަނޑު ފަހު ހާފުގެ 70 ވަނަ މިނެޓުގައި ކާމިޔާބުކޮށްދިނީ ހާލަންޑް އެވެ. މިއީ މިސީޒަނުގައި ލީގުގައި އޭނާ ކާމިޔާބުކުރި 35 ވަނަ ލަނޑެވެ. މިއާއެކު ޕްރެމިއާ ލީގުގައި 34 ލަނޑު ޖަހައިގެން އެލަން ޝިއަރާ އާއި އެންޑީ ކޯލް ހަދާފައިވާ ރެކޯޑް ފަހަތައް ޖައްސާލުމަށްފަހު ޕްރެމިއާ ލީގު ތާރީޚްގައި އެއް ސީޒަނެއްގައި އެންމެ ގިނަ ލަނޑުޖެހުމުގެ ޝަރަފް ހާލަންޑް އަށް ވަނީ ލިބިފައެވެ.

މެޗު ނިމެން ފަސް މިނެޓަށް ވެފައި ވަނިކޮށް ސިޓީގެ ތިންވަނަ ލަނޑު ކާމިޔާބުކޮށްދިނީ އެޓީމުގެ އިގިރޭސި ފޯވާޑް ފިލް ފޯޑެން އެވެ. މިއާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސިޓީ ކުރީގައި އޮވެގެންނެވެ.

ރޭގެ މެޗުން ލިބުނު ތިން ޕޮއިންޓާއެކު އެކު 33 މެޗުން މެންޗެސްޓާ ސިޓީއަށް 79 ޕޮއިންޓް ލިބިފައިވާއިރު، ދެވަނައިގައި އޮތް އާސެނަލްއަށް 34 މެޗު ކުޅެގެން ލިބިފައިވަނީ 78 ޕޮއިންޓެވެ. އަދި ރޭގެ މެޗުން ބަލިވި ވެސްޓްހަމް 34 މެޗު ކުޅެފައިވާއިރު އެޓީމަށް ލިބިފައިވަނީ 34 ޕޮއިންޓާއެކު ލީގު ތާވަލުގެ 15 ވަނަ އެވެ.