23 އަހަރުން ދަށުގެ ޓީ20 ކްރިކެޓް މުބާރާތުގެ ދެވަަނަ މެޗުގައި 23 އަހަރުން ދަށުގެ މާލޭ ބީ ޓީމާއި ވާދަކުރި މެޗު ފުވައްމުލަކުގެ 23 އަހަރުން ދަށުގެ ޓީމުން ކާމިޔާބުކޮށްފިއެވެ.
ފުވައްމުލަކު 23 އަހަރުން ދަށުގެ ޓީމާ މާލޭ ބީ ޓީމު ކުޅުނު މި މެޗުގެ ގުރު ދިމާވުމުން ފުވައްމުލައް ޓީމުން ގަސްދު ކުރީ ފުރަތަމަ ކުޅޭށެވެ. ފުވައްމުލަކު ޓީމުން ކުޅެން އަރައި 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ވަނީ 203 ލަނޑު ހަދާފައެވެ. އެންމެ ރަނގަޅަށް ކުޅުނީ 43 ބޯޅައިން 54 ލަނޑު ހެދި އިބްރާހީމް މަބްސަރެވެ.
ޖަވާބުގައި މާލޭ ބީ ޓީމު ކުޅެން އަރައި 17 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދިފައިވަނީ 51 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ 17 ބޯޅައިން 11 ލަނޑު އެއްކުރި އިސްމާޢީލް ނަޒުވާނެވެ. މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ މަބްސަރުއެވެ.
23 އަހަރުން ދަށުގެ ޓީ20 ކްރިކެޓް މުބާރާތުގައި ކުޅޭ ފުވައްމުލަކު ޓީމުގައި ހިމެނޭ ކުޅުންތެރިން ވަނީ މި އަހަރުގެ ކުރީކޮޅު ކުރިއަށްދިޔަ ފުވައްމުލަކު ކްރިކެޓް ޕްރިމިއާ ލީގާއި، ޓީ20 ކްރިކެޓް ކަޕާއި، ފުވައްމުލަކު 50 އޯވަރު ކްރިކެޓު ލީގާއި، މިދިޔަ ރޯދަ މަހު ކުރިއަށްދިޔަ ކްރިކެޓް ކާނިވަލްގެ ފުވައްމުލަކު އޯޕަން މުބާރާތުގައި ކުޅެފަ އެވެ.
މި އަހަރުގެ 23 އަހަރުން ދަށުގެ ކްރިކެޓް މުބާރާތުގައި ވާދަކުރަނީ ޖުމްލަ ތިން ޓީމެވެ. އެއީ މާލޭން ދެ ޓީމު އަދި ފުވައްމުލަކުން އެއް ޓީމެވެ. މުބާރާތް ކުޅޭނީ ލީގު އުސޫލުން ކޮންމެ ޓީމެއް ކޮންމެ ޓީމަކާ ދެ މެޗު ކުޅޭ ގޮތަށެވެ. އަދި ލީގު ބުރުން ކުރި ލިބޭ ދެ ޓީމުގެ މެދުގައި ފައިނަލް ކުޅޭގޮތަށެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހަފްތާގައެވެ.
Advertisement
This content is created and paid for by advertisers and does not involve Voice Journalists
