ވޭސްޓު މެނޭޖުމަންޓު ކޯޕަރޭޝަން (ވެމްކޯ) އިން ތަހުގީގުކުރަމުންދާ ޖިންސީ ފުރައްސާރައިގެ މައްސަލައަށް ނުފޫޒު ފޯރުވާކަމުގެ ތުހުމަތުގައި އެ ކުންފުނީގެ މެނޭޖިން ޑިރެކްޓަރު ޔޫސުފް ސިރާޖު 14 ދުވަހަށް ސަސްޕެންޑު ކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން އަންގައިފި އެވެ. 

ވެމްކޯގެ ކުރީގެ ޖެނެރަލް މެނޭޖަރަކަށް ތުހުމަތުވާ ޖިންސީ ފުރައްސާރައިގެ މައްސަލައެއް އެ ކުންފުނީގެ އެތެރޭގައި އޮންނަ އެފަދަ މައްސަލަތައް ބަލާ ކޮމިޓީން ތަހުގީގުކުރަނިކޮށް އެ މައްސަލަ މިނިވަންކަމާ އެކު ބެލުމުގެ ފުރުސަތު ހަނި ކުރުމުގެ ގޮތުން މައްސަލަ ބަލާ ކޮމިޓީގެ މުގައްރިރު ޔޫސުފް ރިޒާ ބަދަލު ކޮށްފައިވާކަމަށް ސިރާޖުގެ މައްޗަށް ވަނީ ތުހުމަތުކޮށްފަ އެވެ. 

އެ މައްސަލާގައި ޕީސީބީން ނެރުނު ބަޔާނެއްގައި ބުނެފައިވަނީ ޖިންސީ ފުރައްސާރައިގެ މައްސަލާގައި ސިރާޖުގެ މަސްލަހަތެއް އޮތުމާއެކު އެ މައްސަލައިގެ ތެރެއަށް ނުވަނުމަށް ކުންފުނީގެ ބޯޑުން ނިންމި ނަމަވެސް އެ ނިންމުމާ ސިރާޖު ޚިލާފުވެފައިވާ ކަމަށެވެ.

ސިރާޖުގެ މިއަމަލުތަކަކީ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނާއި ކޯޕަރޭޓު ގަނަވަނެންސްގެ ކޯޑާ ޚިލާފު ކަންކަން ކަމަށް ފާހަގަކޮށް ޕީސީބީން ބުނެފައިވަނީ އޭނާ ސަސްޕެންޑުކޮށްފައިވާ ކަމަށެވެ.

ޕީސީބީން ސިރާޖު ސަސްޕެންޑުކުރަން ނިންމީ މުސާރައާއި އިނާޔަތްތައް ލިބޭ ގޮތުގައި ދެ ހަފުތާއަށް އޮފީހަށް ހާޒިރުނުވެވޭ ގޮތަށެވެ.

އޭނާ ވެމްކޯގެ ޑެޕިއުޓީ މެނޭޖިން ޑިރެކްޓަރަކަށް ހަމަޖައްސާފައިވަނީ، ރައީސް ސާލިހު ވެރިކަމަށް ވަޑައިގަތުމަށްފަހު، ނޮވެމްބަރު 2019 ގައި އެވެ. އޭނާވަނީ އޭގެ ކުރިން، 2011-2014އަށް ހއ. އަތޮޅުގެ އަތޮޅު ކައުންސިލަރު ކަމާއި ރައީސް ކަންވެސް ކުރައްވާފައިވެ އެވެ.