އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 1-0 ގެ ނަތީޖާއަކުން މެންޗެސްޓާ ޔުނައިޓެޑް ބަލިކޮށް ބްރައިޓަން އިން ލީގު ތާވަލުގެ 6 ވަނައަށް ކުރިއަށް ޖެހިލައިފިއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިހާފުގައި އެންމެ ފުރަތަަމަ ނުރައްކާތެރި ހަމަލާ ފެނިގެންދިޔައީ ބްރައިޓަންގެ ފަރާތުންނެވެ. މިގޮތުން ފުރަތަަމަ ހާފުގެ ހަތަރުވަނަ މިނެޓުގައި އެޓީމުގެ ޖަޕާން މިޑްފީލްޑަރު ކައޯރު މިޓޯމާއަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ މެންޗެސްޓާ ޔުނައިޓެޑް ގޯލްކީޕަރު ވަނީ ދިފާއުކޮށްފަ އެވެ.

ފުރަތަަމަ ހާފުގައި މެންޗެސްޓާ ޔުނައިޓެޑުން އެންމެ ހުސް ފުރުސަތެއް ލިބުނީ އެޓީމުގެ ފޯވާޑް މާކަސް ރަޝްފޯޑަށެވެ. ނަމަވެސް 28 ވަނަ މިނެޓުގައި ބްރައިޓަންގެ ދެ ޑިފެންޑަރުން ކައިރިން ނައްޓާލުމަށް ފަހު ރަޝްފޯޑް ފޮނުވާލި ހަމަލާ ބްރައިޓަންގެ ގޯލްކީޕަރު ޖޭސަން ސްޓީލް ވަނީ ހުޝިޔާރުކަމާއެކު ދިފާއުކޮށްފަ އެވެ. އަދި މިހާފު ނިމުމުގެ ކުރިން ޔުނައިޓެޑުގެ ފްރާންސް ފޯވާޑް އެންތަނީ މާޝިއަލް އަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާގެ ހުރަހަކަށް ވީ ވެސް ޖޭސަން ސްޓީލް އެވެ.

ދެވަނަ ހާފުގައި ބްރައިޓަން އިން އެޓީމުގެ ކުޅުން ރަނގަޅުކޮށް ގިނަ ފުރުސަތުތަކެއް ތަނަވަސްކުރި ނަމަވެސް މިހާފުގައި ވެސް އެންމެ ހުސް ފުރުސަތެއް ލިބުނީ މެންޗެސްޓާ ޔުނައިޓެޑަށެވެ. ދެވަނަ ހާފުގެ 68 ވަނަ މިނެޓުގައި ބްރައިޓަންގެ ޕެނަލްޓީ އޭރިއާ ތެެރެއިން ޔުނައިޓެޑުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް ފޮނުވާލި ބާރު ހަމަލާގެ ހުރަހަކަށް ވީ މިރޭގެ މެޗުގައި މޮޅުކުޅުމެއް ދެއްކި ޖޭސަން ސްޓީލް އެވެ.

މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ބްރައިޓަން އަށް ލިބުނު ޕެނަލްޓީއަކުން ކާމިޔާބުކޮށްދީ އެޓީމުގެ އާޖެންޓީނާ މިޑްފީލްޑަރު އެލެކްސިސް މެކް އެލިސްޓާއެވެ. މިއީ ޔުނައިޓެޑުގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ދިން ޕެނަލްޓީއެކެވެ.

މިރޭގެ މެޗުން ލިބުނު ތިން ޕޮއިންޓާއެކު 32 މެޗު ކުޅެގެން ބްރައިޓަންއަށް 55 ޕޮއިންޓް ލިބިފައިވާއިރު މިވަގުތު އެޓީމު އޮތީ ފަސް ވަނައިގައި އޮތް ލިވަޕޫލަށް ވުރެ ދެ މެޗު މަދުން ކުޅެ ތާވަލުގެ ހަ ވަނައިގައެވެ. 34 މެޗު ކުޅެގެން ލިވަޕޫލަށް 59 ޕޮއިންޓް ލިބިފައިވާއިރު މިވަގުތު އެޓީމު އޮތީ ތާވަލުގެ ފަސްވަނައިގައެވެ.

މިރޭގެ މެޗުން ބަލިވި މެންޗެސްޓާ ޔުނައިޓެޑަށް 33 މެޗު ކުޅެގެން 63 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލުގެ ހަތަރުވަނައިގައެވެ. އަދި ތިންވަނައިގައި އޮތް ނިއުކާސަލް ޔުނައިޓެޑާއި އެޓީމާއި ދެމެދު ދެ ޕޮއިންޓްގެ ފަރަގެއް އެބައޮތެވެ.