މިދިޔަ 24 ގަޑިއިރު ތެރޭގައި ސ. ގަމަށް 120 މިލިމީޓަރުގެ ވާރޭ ވެހިއްޖެ ކަމަށް މޫސުމާ ބެހޭ ގައުމީ އިދާރާއިން ހާމަކޮށްފިއެވެ.
އިއްޔެ ހެނދުނު 8:00އިން މިއަދު ހެނދުނު 8:00ގެ ނިޔަލަށް ރާއްޖޭގެ އެކި ހިސާބުތަކަށް ވާރޭ ވެހިފައިވާކަމަށް ރެކޯޑު ކުރެވިފައިވާ މިންވަރު ހާމަ ކުރަމުން މެޓުން ބުނީ، އެންމެ ގިނައިން ވާރޭ ވެހިފައި ވަނީ ސ. ގަމަށް ކަމަށެވެ. އެއީ 120 މިލިމީޓަރެވެ.
ސ. ހުޅުމީދޫއަށް 113.2 މިލިމީޓަރުގެ ވާރޭ ވެހިފައި ވާއިރު މާލެއަށް ވެހިފައި ވަނީ 81.3 މިލިމީޓަރުގެ ވާރޭއެވެ.
އޭގެ އިތުރުން ދެން އެންމެ ގިނައިން ވާރޭ ވެހިފައި ވަނީ ލ. ކައްދޫއަށާއި ވ. ރަކީދޫއަށެވެ. ކައްދޫއަށް 41.8 މިލިމީޓަރުގެ ވާރޭ ވެހިފައި ވާއިރު ރަކީދޫއަށް ވެހިފައި ވަނީ 35.2 މިލިމީޓަރުގެ ވާރޭއެވެ.
މޫސުން ގޯސްވާނެ ކަމަށް ލަފާކޮށް މެޓުން ވަނީ ތ. އަތޮޅުން ފެށިގެން އައްޑޫގެ ނިޔަލަށް ހުދު ސަމާލު ނެރެފައެވެ.
މިއަދު މެންދުރުގެ ނިޔަލަށް ނެރުނު މި ސަމާލުގައި މެޓުން ބުނީ، އެ ސަރަހައްދުތަކަށް ބޯކޮށް ވާރޭ ވެހުމާއެކު ގުގުރުން އެކަށީގެންވާ ކަމަށާއި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކުރެވޭ ކަމަށެވެ.
Advertisement
This content is created and paid for by advertisers and does not involve Voice Journalists
