އިހްތިރާމު ކުރުމަކީ ދީނުގެ މަތިވެރި އަހުލާގެއްކަން ހަނދާން ކޮށްދެމުމް، މިއަދުގެ ހުކުރު ޚުޠުބާ، އިޙްތިރާމް ކުރުމަށް ހާއްސަ ކޮށްފިއެވެ.

ޚުޠުބާގައި ބުނީ އިހުތިރާމު ނުކުރުމުގެ އިޖުތިމާއީ ބަވާ މި މުޖުތަމައުގައި ފެތުރިފައި ވާކަމަށެވެ. 

"ދަރީން މައިންބަފައިންނަށް، މައިންބަފައިން ދަރިންނަށް، އަވަށްޓެރިން އަވަށްޓެރިންނަށް، ދަރިވަރުން އުސްތާޛުންނަށް، އުސްތާޛުން ދަރިވަރުންނަށް، މުވައްޒަފުން ވެރިންނަށް، ވެރިން މުވައްޒަފުންނަށް އިހުތިރާމު ކުރުން ވަނީ ހިތާމަ ކުރަން ޖެހޭ ފަދަ މިންވަރަކަށް ކުޑަވެފަ،" ޚުޠުބާގައި ބުންޏެވެ.

މުޅި އިސްލާމީ ރިސާލަތު ބިނާވެގެން ވަނީ އިހުތިރާމު ކުރުމުގެ މައްޗަށްކަން ހަނދާންކޮށްދެމުން ޚުޠުބާގައި ބުނީ އިންސާނާ އުފައްދަވާފައި ވަނީ އިހުތިރާމު ލިބިގެންވާ މީހެއްގެ ގޮތުގައި ކަމަށެވެ.

އާއިލާތައް ރޫޅެނީ އެކަކު އަނެކަކަށް އިހުތިރާމު ނުކުރާތިކަން ފާހަގަ ކުރަމުން ޚުޠުބާގައި ބުނީ ޒަވާޖީ ހަޔާތް ކާމިޔާބު ވުމުގެ އަސްލަކީ އިހުތިރާމު ކުރުން ކަމަށެވެ. އޭގެ ތެރޭގައި އެކަކު އަނެކަކުގެ ސިއްރުތައް ހިފެހެއްޓުމާއި އެކަކު އަނެކަކަށްޓަކައި ގުރުބާންވެ ހެޔޮ އެދިގެން ކަމަށް ޚުޠުބާގައި ބުންޏެވެ.

އިހުތިރާމު ކުރުމުގެ ތެރޭގައި އެހެން މީހުންގެ ވަންހަނާ ކުރުންވެސް ހިމެނޭކަމަށް ޚުޠުބާގައި ބުންޏެވެ. އެގޮތުން މީހުންގެ ވާހަކަތައް ވަގަށް އަޑުއަހައި ފާޅުކުރުމާއި މީހުންގެ ފޮޓޯތަކާއި ވީޑިއޯތައް އާއްމުކުރުމަކީ އިހުތިރާމުގެ ދާއިރާއިން ބޭރު ކަންތައްތައް ކަމަށް ޚުޠުބާގައި ބުންޏެވެ.

މީގެ އިތުރުން ޚުޠުބާގައި ބުނީ ޖަލްސާތަކާއި ބައްދަލުވުން ތަކުގައި ހިނގާ ކަންތައްތަކާއި ދެކެވޭ ވާހަކަ ތަކަކީވެސް އެއަށް އިހުތިރާމު ކުރަންޖެހޭ ސިއްރުތަކެއް ކަމަށެވެ. 

އިހުތިރާމު ކުރުމުގެ ތެރޭގައި އިޖުތިމާއީ ގޮތުން އެއްބަޔަކު އަނެއްބަޔަކަށް އިހުތިރާމު ކުރުންވެސް ހިމެނޭކަމަށް ޚުޠުބާގައި ބުންޏެވެ.