ޗާގޯސް މައްސަލައިގައި ރައީސްގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމަކީ ޤައުމީ މަސްލަޙަތެއް ކަމަށް ޖަމިއްޔަތުއް ސަލަފްގެ ރައީސް އައްޝެއިޙް ޢަބްދުالله ބިން މުޙައްމަދު އިބްރާހިމް ވިދާޅުވެއްޖެއެވެ.

ޝެއިޙް މިހެން ވިދާޅުވީ ރައީސް އިބްރާހިމް މުޙައްމަދު ޞާލިޙްގެ އިތުބާރުނެތް ކަމުގެ މައްސަލަހުށައަޅަން މަޝްވަރާ ކޮށްފި ކަމަށް ބުނާ ޚަބަރެއް ޓްވިޓާގައި ޙިއްސާ ކުރައްވަމުންނެވެ.

"ޗާގޯސް މައްސަލައިގާ  ޤައުމާއި ރައްޔިތުންނަށް ޚިޔާނާތްތެރިވެފައިވާތީ، ރައީސްގެ އިތުބާރުނެތްކަމުގެ މައްސަލަ މަޖްލީހަށް ވެއްދުމަކީ  ޤައުމީ މަޞްލަޙަތެއް" ޝެއިޙް ޢަބްދުالله ގެ ޓްވީޓުގައި ވިދާޅުވެފައިވެއެވެ.

އަދި އެޓްވީޓުަގައި އިތުރަށް ވިދާޅުވެފައި ވަނީ މިމައްސަލައަކީ ރާއްޖޭގެ ޖިއޮގްރަފީ އިމާ ގުޅިފައިވާ ސަރަޙައްދީ، ސިޔާދަތީ، ސީރިއަސް މައްސަލައެއް ކަމަށެވެ. އަދި މައްސަލަ ބެލެވެންޖެހޭ ކަމަށާއި،  ޤައުމުގެ އިމަކީ ބޮޑުއަމާނާތެއް ކަަމަށެވެ.

ޗާގޯސް މައްސަލަ ކަމަށް ވާ، މޮރިޝަސް އާއި ރާއްޖޭގެ ކަނޑުގެ ސަރަހައްދުގެ ފުށުއަރާ ކަމަށްބުނާ ބައި ބެހުމުގެ މައްސަލައިގައި އިޓްލޮސް އިން ވަނީ ގޮތެއް ނިންމައިފައެވެ.

އެގޮތުން އިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.މި މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅުމަށެވެ.                                                      ނަމަވެސް ރާއްޖެއިން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންއެޅުމަށެވެ.ދެ ފަރާތުގެ ދައުވާތަކާއި ދިފާއީ ވާހަކަތައް އަޑު އެހުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.                                              އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.   
ސަރުކާރާއި ސަރުކާރަށް ތާއީދު ކުރައްވާ ފަރާތްތަކުން އިޓްލޮސްގެ މި ނިންމުމާއި މެދު އުފާ ފާޅުކޮށް މަރުހަބާ ކިޔަމުންދާއިރު، އިދިކޮޅު ފަރާތްތަކުން ދަނީ މިކަމާއި ގުޅިގެން ނުރުހުން ފާޅު ކޮށް ފާޑުކިޔަމުންނެވެ.