އިޓާލިއަން ލީގުގައި މިރޭ އަމިއްލަ ދަނޑުގައި ދެވަނައިގައި އޮތް ލާޒިއޯ 2-0 ގެ ނަތީޖާއަކުން ބަލިކޮށް އޭސީ މިލާނުން ތާވަލުގެ ހަތަރު ވަނައަށް ކުރިއަށް ޖެހިލައިފިއެވެ.

މިރޭގެ މެޗުގެ ފުރަތަަމަ ހާފުގެ 17 ވަނަ މިނެޓުގައި އޭސީ މިލާނުގެ އަލްޖީރިއާ މިޑްފީލްޑަރު އިސްމާއީލް ބެނަސަރ ވަނީ ލަނޑެއް ކާމިޔާބުކޮށް އެޓީމަށް ލީޑު ނަގައިދިފައެވެ. މިއީ އެޓީމުގެ ފުރާންސް ފޯވާޑް އޮލިވިއޭ ޖިރޫޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފުރަތަަމަ ހާފުގައި އޭސީ މިލާނުގެ ދެވަނަ 29 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ތިއޯ ހެނާންޑޭޒް އެވެ. މިއާއެކު މެޗުގެ ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އޭސީ މިލާން ކުރީގައި އޮވެގެންނެވެ.

ދެވަަނަ ހާފުގައި ލާޒިއޯ އިން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 34 މެޗުން އޭސީ މިލާނަށް 61 ޕޮއިންޓް ލިބިފައިވާއިރު، މިވަގުތު އެޓީމު އޮތީ ލީގު ތާވަލުގެ ހަތަރު ވަނައިގައެވެ. ނަމަވެސް މިރޭ އިންޓަރ މިލާނާއި ރޯމާ ވާދަކުރާ މެޗުން އިންޓަ މޮޅުވެއްޖެނަމަ އެޓީމަށް ހަތަރުވަނަ ލިބޭނެއެވެ. އިންޓަ މިލާން މިވަގުތު އޮތީ 33 މެޗު ކުޅެގެން ލިބުނު 60 ޕޮއިންޓާއެކު ތާވަލުގެ ފަސްވަނައިގައެވެ. އަދި މިރޭގެ މެޗުން ބަލިވި ލާޒިއޯ 34 މެޗު ކުޅެފައިވާއިރު، އެޓީމު އޮތީ 63 ޕޮއިންޓާއެކު ތާވަލުގެ ދެވަނައިގައެވެ.