އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ބޯންމައުތު 3-1 ގެ ނަތީޖާއަކުން ބަލިކޮށް، ޗެލްސީ އިން އެޓީމުގެ ބަލިވުމުގެ ސިލްސިލާ ނިމުމަކަށް ގެނެސްފި އެވެ.

ފްރޭންކް ލަމްޕާޑް ޗެލްސީގެ ކޯޗުކަމާއި ހަވާލުވި ފަހުން އެޓީމު އެންމެ ފަހުން ކުޅުނު ހަ މެޗުން ބަލިވެފައިވާއިރު، މިރޭގެ މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މިލަނޑު ފުރަތަަމަ ހާފުގެ 9 ވަނަ މިނެޓުގައި ކާމިޔާބުކޮށްދިނީ އެޓީމުގެ އިގިރޭސި މިޑްފީލްޑަރު ކޮނޯރ ގަލަގާރ އެވެ. މިއީ އެޓީމުގެ ފްރާންސް މިޑްފީލްޑަރު އެންގޯލާ ކަންޓޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފު ނިމުމުގެ ކުރިން ބޯންމައުތުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ އުރުގުއާއީ ޑިފެންޑަރު މަޓިއަސް ވިނާ އެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެގެންނެވެ.

ދެވަަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މި ހާފުގައި ބޯންމައުތަށްވަނީ މެޗުގެ ލީޑު ނެގުމަށް ރަގަޅު ހުސް ފުރުސަތެއް ލިބި ބޭކާރުވެފައެވެ. ފަހު ހާފުގެ 71 ވަނަ މިނެޓުގައި ޗެލްސީގެ ޕެނަލްޓީ އޭރިއާ ތެެރެއިން ބޯންމައުތުގެ ޑިފެންޑަރު ވިނާ މުޅިން ހުސްކޮށް ހުރެ ފޮނުވާލި ހަމަލާ ޗެލްސީގެ ގޯލްކީޕަރު ކެޕާ ވަނީ ހުޝިޔާރުކަމާއެކު ދިފާއުކޮށްފައެވެ.

ޗެލްސީއަށް މި މެޗުގައި ދެވަނަ ފަހަރަށް ލީޑު ހޯދައިދިނީ 82 ވަނަ މިނެޓުގައި އެޓީމުގެ ފުރާންސް ޑިފެންޑަރު ބެނޮއިޓް ބަޑިއާޝިލޭ އެވެ. މިއީ އެޓީމުގެ މޮރޮކޯ މިޑްފީލްޑަރު ހަކީމް ޒިޔެޗް ހިލޭ ޖެހުމަކުން ގޯލު ކުރިމައްޗަށް ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ޗެލްސީގެ ތިންވަނަ ލަނޑު ދެވަނަ ހާފުގެ 86 ވަނަ މިނެޓުގައި ކާމިޔާބުކޮށްދިނީ ޕޯޗުގަލް ފޯވާޑް ޖައާއު ފެލިކްސް އެވެ. މިއީ އެޓީމުގެ އިގިރޭސި ފޯވާޑް ރަހީމް ސްޓާލިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޗެލްސީ މޮޅުވެގެންނެވެ. އަދި މިއީ އެންމެ ފަހުން ކުޅުނު 10 މެޗުގެ ތެރެއިިން އެޓީމު މޮޅުވި ފުރަތަމަ މެޗެވެ.

މިރޭގެ މެޗުން ލިބުނު ތިން ޕޮއިންޓާއެކު 34 މެޗު ކުޅެގެން ޗެލްސީއަށް 42 ޕޮއިންޓް ލިބިފައިވާއިރު، މިވަގުތު އެޓީމު އޮތީ ލީގު ތާވަލުގެ 11 ވަނައިގައެވެ. އަދި މިރޭގެ މެޗުން ބަލިވި ބޯންމައުތު 35 މެޗު ކުޅެފައިވާއިރު އެޓީމަށް ލިބިފައިވަނީ 39 ޕޮއިންޓާއެކު ތާވަލުގެ 14 ވަނައެވެ.