އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 2-1 ގެ ނަތީޖާއަކުން ލީޑްސް ޔުނައިޓެޑް ބަލިކޮށް މެންޗެސްޓާ ސިޓީން ލީގު ތާވަލުގެ ކުރީގައި 4 ޕޮއިންޓުގެ ލީޑެއް ނަގައިފިއެވެ.

މިރޭގެ މެޗުގެ ފުރަތަަމަ ހާފުގައި މެންޗެސްޓާ ސިޓީން ދެ ލަނޑުގެ ލީޑެއް ނެގިއިރު، އެޓީމުގެ ދެލަނޑުވެސް ކާމިޔާބުކޮށްދިނީ ޖަރުމަނުގެ މިޑްފީލްޑަރު ގުންޑޮގާން އެވެ. އަދި މި ދެލަނޑު ޖެހުމަށް ފުރުސަތު ތަނަވަސްކޮށްދިނީ އެޓީމުގެ އަލްޖީރިއާ ފޯވާޑް ރިޔާދް މަހުރޭޒް އެވެ.

ސިޓީގެ ފުރަތަަމަ ލަނޑު 19 ވަނަ މިނެޓުގައި އަދި ދެވަނަ ލަނޑު 27 ވަނަ މިނެޓުގައި ގުންޑޮގާން ކާމިޔާބުކޮށްދިންއިރު، ފުރަތަމަ ހާފުގައި އެޓީމުގެ ލީޑު ފުޅާކުރުމަށް ހާލަންޑަށް ލިބުނު ހުސް ފުރުސަތުތަކުގައި އޭނާއަށް ބޭނުން ހިފޭ ގޮތެއްނުވި އެވެ.

މިގޮތުން ފުރަތަަމަ ހާފުގެ 15 ވަނަ މިނެޓުގައި ހާލަންޑް ފޮނުވާލި ހަމަލާ ލީޑްސްގެ ކީއްޕަރު ދިފާއުކުރިއިރު، 25 ވަނަ މިނެޓުގައި މުޅިން ހުސްކޮށް ހުރެ ފޮނުވާލި ބޯޅަ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ.

ދެވަނަ ހާފުގައި ލީޑްސް އިން އެޓީމުގެ ކުޅުން ރަގަޅުކުރި ނަމަވެސް މިހާފުގައި ވެސް ލަނޑު ޖަހާނެ އެންމެ ހުސް ފުރުސަތެއް ލިބުނީ މެންޗެސްޓާ ސިޓީއަށެވެ. މިގޮތުން ދެވަަނަ ހާފުގެ 62 ވަނަ މިނެޓުގައި ލީޑްސް ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ހާލަންޑް ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

ދެވަަނަ ހާފުގެ 84 ވަނަ މިނެޓުގައި ލީޑްސްގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ވަނީ މެންޗެސްޓާ ސިޓީއަށް ޕެނަލްޓީއެއް ދީފައެވެ. ނަމަވެސް ގުންޑޮގާން ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. އަދި އޭގެ މިނެޓެއް ފަހުން ލީޑްސް އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ ދެވަަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ތަޖުރިބާކާރު ފޯވާޑް ރޮޑްރިގޯ އެވެ. 

މިރޭގެ މެޗުން ލިބުނު ތިން ޕޮއިންޓާއެކު އެކު 34 މެޗުން މެންޗެސްޓާ ސިޓީއަށް 82 ޕޮއިންޓް ލިބިފައިވާއިރު، ދެވަނައިގައި އޮތް އާސެނަލްއަށް 34 މެޗު ކުޅެގެން ލިބިފައިވަނީ 78 ޕޮއިންޓެވެ. އަދި މިރޭގެ މެޗުން ބަލިވި ލީޑްސް ޔުނައިޓެޑް 35 މެޗު ކުޅެފައިވާއިރު އެޓީމަށް ލިބިފައިވަނީ 30 ޕޮއިންޓާއެކު ތާވަލްގެ 17 ވަނައެވެ.