ކޮޕާ ޑެލްރޭ ފައިނަލުގައި މިރޭ އޮސަސޫނާ ބަލިކޮށް ރެއާލް މެޑްރިޑުން މުބާރާތުގެ ޗެމްޕިއަންކަން 20 ވަނަ ފަހަރަށް ހޯދައިފި އެވެ.

މިރޭގެ ފައިނަލް މެޗުގެ ފުރަތަަމަ ހާފުގެ ދެވަަނަ މިނެޓުގައި ރެއާލް މެޑްރިޑުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ ފޯވާޑް ރޮޑްރިގޯ އެވެ. މިއީ އެޓީމުގެ ވިނީޝިއަސް ޖޫނިއަރ އޮސަސޫނާގެ ތިން ކުޅުންތެރިން ކައިރިން ނައްޓާލުމަށް ފަހު ބޯޅައާއެކު ޕެނަލްޓީ އޭރިއާ ތެރެއަށް ވަދެ މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގެ 25 ވަނަ މިނެޓުގައި ރެއާލްގެ ކެޕްޓަން ކަރީމް ބެންޒީމާ އޮސަސޫނާގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ އެޓީމުގެ ގޯލްކީޕަރު ސާޖިއޯ ހެރޭއިރާ ވަނީ ހުޝިޔާރުކަމާއެކު ދިފާއުކޮށްފައެވެ. އަދި 32 ވަނަ މިނެޓުގައި އޮސަސޫނާގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުން ރެއާލްގެ ޑިފެންޑަރު ޑޭވިޑް އަލަބާ ފޮނުވާ ހަމަލާ އަމާޒުވީ ގޯލުގެ ހުރަސް ދަނޑިއަށެވެ. މީގެ އިތުރުން ވެސް ފުރަތަމަ ހާފުގެ 35 ވަނަ މިނެޓުގައި ވިނީޝިއަސް ޖޫނިއަރ އަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ހުރަސް ދަނޑިމަތިން ބޭރަށެވެ.

Advertisement

ދެވަަނަ ހާފުގައި އޮސަސޫނާ އިން އެޓީމުގެ ކުޅުން ރަނގަޅުކޮށް ރެއާލް މެޑްރިޑްގެ ފަހަތަށް ބާރުބޮޑު ކުރަމުން ދިއުމުގެ ނަތީޖާއެއްގެ ގޮތުން ދެވަނަ ހާފުގެ 58 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިލަނޑު އެޓީމަށް ކާމިޔާބުކޮށްދިނީ ލޫކަސް ޓޯރޯ އެވެ. މިއީ ރެއާލްގެ ޕެނަލްޓީ އޭރިއާ ބޭރުން ލިބުނު ފުރުސަތުގައި ގޯލުގެ ކަނަށް ބޯޅަ އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިރޭގެ ފައިނަލް މެޗުގައި ރެއާލް މެޑްރިޑަށް ދެވަަނަ ފަހަރަށް ލީޑު ހޯދައިދިނީ ވެސް ފުރަތަަމަ ލަނޑު ކާމިޔާބުކޮށްދިން ބްރެޒިލްގެ ފޯވާޑް ރޮޑްރިގޯ އެވެ. މިއީވެސް ވިނީޝިއަސްގެ މަސައްކަތުން ތަނަވަސްކޮށްދިން ފުރުސަތެއްގައި ވަލްވެޑޭ ފޮނުވާލި ބޯޅަ އޮސަސޫނާގެ ޑިފެންޑަރެއްގެ ފައިގައި ޖެހިފައި މިސްރާބު ބަދަލުވެގެން އެޓީމުގެ ޕެނަލްޓީ އޭރިއާ ތެެރެއިން މުޅިން ހުސް ލިބުނު ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން މޮޅުވެ ރެއާލް މެޑްރިޑުން ކޮޕާ ޑެލްރޭގެ ޗެންޕިއަންކަން ހޯދިއިރު މި މުބާރާތް އެންމެ ފަހުން އެޓީމަށް ކާމިޔާބު ކުރެވިފައި ވަނީ 2014 ވަނަ އަހަރު އެވެ. އަދި މި މުބާރާތުގެ ފައިނަލްގައި ރެއާލް މެޑްރިޑުން 40 ފަހަރު ވާދަކޮށްފައިވާއިރު އޭގެތެރެއިން 20 މެޗުން އެޓީމު ވަނީ ބަލިވެފަ އެވެ.