އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 1-0 ގެ ނަތީޖާއަކުން ބްރެންޓްފޯޑް ބަލިކޮށް ލިވަޕޫލުން ގަދަ ހަތަރެއްގެ އުންމީދު ދަމަހައްޓައިފި އެވެ.

މިރޭގެ މެޗުގެ ފުރަތަަމަ ހާފުގެ 13 ވަނަ މިނެޓުގައި ލިވަޕޫލްގެ މުހައްމަދު ސަލާހް ވަނީ ލަނޑެއް ކާމިޔާބުކޮށް އެޓީމަށް ލީޑު ހޯދައިދީފައެވެ. މިއީ އެޓީމަށް ލިބުނު ކޯނަރަކުން ރޮބަޓްސަން ގޯލު ކުރިމައްޗަށް ހުރަސްކޮށްދިން ބޯޅައެއް ވާޖިލް ވެން ޑައިކް ބޮލުން ޖައްސާލުމުން ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފު ނިމުމުގެ ކުރިން ބްރެންޓްފޯޑްގެ އިގިރޭސި ފޯވާޑް ޓޯނީ ލަނޑެއް ކާމިޔާބުކޮށް އެޓީމަށް ނަތީޖާ އެއްވަރުކޮށްދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. އަދި އޭގެ މިނެޓެއް ފަހުން ޓޯނީއަށް ލިބުނު ހުސް ފުރުސަތެއްގައި އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ.

Advertisement

ދެވަނަ ހާފުގައި ބްރެންޓްފޯޑް އިން އެޓީމުގެ ކުޅުން ރަނގަޅުކޮށް މެޗުގެ ކޮންޓްރޯލް ހޯދި ނަމަވެސް ލިވިޕޫލުގެ ޑިފެންސް ފޫއަޅުވާލުމަށް ފަހު އެޓީމަށް ލަނޑެއް ކާމިޔާބުކުރެވޭގޮތެއް ނުވިއެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 35 މެޗު ކުޅެގެން ލިވަޕޫލަށް 62 ޕޮއިންޓް ލިބިފައިވާއިރު، އެޓީމު މިވަގުތު އޮތީ ޕްރެމިއާ ލީގު ތާވަލުގެ ފަސްވަނައިގައެވެ. ހަތަރު ވަނައިގައި އޮތް މެންޗެސްޓާ ޔުނައިޓެޑަށް 33 މެޗު ކުޅެގެން 63 ޕޮއިންޓް ލިބިފައިވާއިރު، މާދަމާރޭ އެޓީމު ނުކުންނާނީ ރަށުން ބޭރުގައި ވެސްޓްހަމް އާއި ދެކޮޅަށެވެ.

މިރޭގެ މެޗުން ބަލިވި ބްރެންޓްފޯޑް 35 މެޗު ކުޅެގެން 50 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ 9 ވަނައިގައެވެ.