ޖަރުމަނު ބުންޑަސްލީގާގައި މިރޭ ރަށުން ބޭރުގައި ވާރޑާ ބްރޭމަން އަތުން 2-1 ގެ ނަތީޖާއަކުން މޮޅުވެ، ލީގު ތާވަލުގެ ކުރީގައި ބަޔާން މިއުނިކުން ހަތަރު ޕޮއިންޓުގެ ލީޑެއް ނަގައިފިއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި އެންމެ ހުސް ފުރުސަތެއް ލިބުނީ ބަޔާން މިއުނިކްގެ ޑިފެންޑަރު ބެންޖަމިން ޕަވާޑްއަށެވެ. ފުރަތަަމަ ހާފުގެ 21 ވަނަ މިނެޓުގައި ހިލޭ ޖެހުމަކުން ގޯލު ކުރިމައްޗަށް ހުރަސްކޮށްދިން ބޯޅައެއް ޕަވާޑް މުޅިން ހުސްކޮށް ހުރެ ބޮލުން ފޮނުވާލި ހަމަލާ ބްރޭމަންގެ ކީއްޕަރު ވަނީ ދިފާއުކޮށްފައެވެ.

ފުރަތަަމަ ހާފުގައި 35 ވަނަ މިނެޓުގައި ބްރޭމަންގެ ކްރިސްޓިއަން ގްރޮސްއަށް ވަނީ އެޓީމަށް ލީޑު ނަގައިދިނުމަށް ރަގަޅު ހުސް ފުރުސަތެއް ލިބިފައެވެ. ނަމަވެސް އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ދެޓީމު އެއްވަރުވެގެންނެވެ.

ދެވަަނަ ހާފު ފެށިގެން 56 ވަނަ މިނެޓުގައި ބަޔާންގެ މާނޭއަށް ވަނީ ލަނޑު ޖަހާނެ ރަގަޅު ހުސް ފުރުސަތެއް ލިބި ބޭނުން ނުކުރެވިފައެވެ. އަދި އޭގެ ހަ މިނެޓް ފަހުން ދެވަަނަ ހާފުގެ 62 ވަނަ މިނެޓުގައި އެޓީމަށް ލީޑު ހޯދައިދިނީ ޖަރުމަންގެ ފޯވަޑް ސާޖް ގްނަބްރީ އެވެ. މިއީ އެޓީމުގެ ޖަރުމަނު މިޑްފީލްޑަރު ޖަމާލު މުސިއާލާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބަޔާންގެ ދެވަަނަ ލަނޑު 72 ވަނަ މިނެޓުގައި ކާމިޔާބުކޮށްދިނީ އެޓީމުގެ ލެރޯއީ ސާނޭ އެވެ. މިއީ އެޓީމުގެ މޮރޮކޯ ޑިފެންޑަރު ނޫސައިރު މަޒްރައުއީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ވާރޑާ ބްރޭމަން އަށް ނަތީޖާގެ ފަރަގު ކުޑަކޮށްދިނީ ދެވަަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޖަރުމަނުގެ މިޑްފީލްޑަރު ނިކްލަސް ޝްމިޓް އެވެ. މިއީ ބަޔާންގެ ޕެނަލްޓީ އޭރިއާ ބޭރުން ލިބުނު ބޯޅަ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ބަޔާން މިއުނިކް މޮޅުވެގެންނެވެ.

މި މެޗުން ލިބުނު ތިން ޕޮއިންޓާއެކު އެކު 31 މެޗު ކުޅެގެން ބަޔާން މިއުނިކަށް 65 ޕޮއިންޓް ލިބިފައިވާއިރު، ދެވަނައިގައި އޮތް ބްރޫޝިއާ ޑޯޓްމަންޑް 30 މެޗު ކުޅެގެން ލިބިފައިވަނީ 61 ޕޮއިންޓެވެ. އަދި މިރޭގެ މެޗުން ބަލިވި ވާރޑާ ބްރޭމަން 31 މެޗު ކުޅެގެން 35 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލުގެ 12 ވަނައިގައެވެ.