މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ފެށުމުގެ ގޮތުން މިރޭ ކުޅެވުނު ޗެރިޓީ ޝީލްޑް މެޗު އެންމެ ފަހުގެ ޗެމްޕިއަން ޖޯލިބީއިން ކާމިޔާބުކޮށްފިއެވެ.

ރ.މީދޫ ފުޓްސަލް ދަނޑުގައި މިރޭ ކުޅެވުނު ޗެރިޓީ ޝީލްޑް މެޗު ޝަރަފްވެރި ކޮށްދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމް އެވެ. މުބާރާތުގެ އެންމެ ފަހުގެ ޗެމްޕިއަން ޖޯލިބީއިން އާއި ރަނަރަޕް ޔޫ އެންޑް މީ ވާދަކުރި މިރޭގެ މެޗު ވާދަވެރި ކުޅުމަކަށްފަހު ޖޯލިބީއިން އިން މެޗު ކާމިޔާބުކުރީ 1-0 ގެ ނަތީޖާއަކުން ނެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގައި ކާމިޔާބުކޮށްދިނީ ޖޯލިބީއިންގެ އަބްދުﷲ ހަނީފް އެވެ. އަދި މިރޭގެ މެޗުގެ މޮޅު ކުޅުންތެރިޔަކަށް ހޮވުނީ ޖޯލިބީއިންގެ ގޯލްކީޕަރު މަހުމޫދު ޝިފާއު އެވެ.

2022 ވަނަ އަހަރުގެ ރާބަދި ޗެލެންޖް ފައިނަލްގައި މިދެޓީމު ވާދަކުރި މެޗު ފަސޭހަކަމާއި އެކު 6-0 ގެ ތަފާތުބޮޑު ނަތީޖާއަކުން ޖޯލިބީއިން ކާމިޔާބުކުރި ނަމަވެސް މިރޭގެ މެޗުގައި ޔޫ އެންޑް މީ އިން ވަނީ ވާދަވެރި މޮޅު ކުޅުމެއް ދައްކައިދީފައެވެ.

މިއަހަރުގެ ރާބަދި ޗެލެންޖުގައި 14 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 14 ޓީމު ހަތަރު ގުރޫޕަކަށް ބަހާލައިގެންނެވެ. ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ.

ގުރޫޕް އެކެއް އަދި ދޭއްގެ އެއްވަނަ އަދި ދެވަނަ ޓީމު މުބާރާތުގެ ކުއާޓާ ފައިނަލަށް ހޮވޭއިރު ގްރޫޕް ތިނެއް އަދި ހަތަރަކުން ކުއާޓާގެ ފުރުސަތު ލިބޭނީ ގްރޫޕްގެ އެއްވަނަ ޓީމަށެވެ. އަދި ކުއާޓާ ފައިނަލުގެ ފަހު ދެޖާގަ ލިބޭނީ ގްރޫޕް ތިނެއް އަދި ހަތަރެއްގެ ތިންވަނަ ޓީމާއި ހަތަރުވަނަ ޓީމުގެ މެދުގައި ޕްލޭއޮފް ދެމެޗު ކުޅުމަށްފަހު އެ ދެމެޗުން މޮޅުވާ ދެޓީމަށެވެ.

މާދަމާ ރެއިން ފެށިގެން މިމަހުގެ 16 ވަނަ ދުވަހުގެ ނިޔަލަށް މުބާރާތުގެ ގުރޫޕް ސްޓޭޖް މެޗުތައް ކުރިއަށްދާއިރު، ކޮންމެ ރެއަކުވެސް ދެ މެޗު ކުޅުމަށް ވަނީ ހަމަޖެހިފައެވެ. މެއި 17 ވަނަ ދުވަހު ގްރޫޕް ތިނެއް އަދި ހަތަރެއްގެ ޕްލޭއޮފް ދެމެޗު ކުޅޭއިރު، މެއި 18 އަދި 19 ވަނަ ދުވަހު މުބާރާތުގެ ކުއާޓާ ފައިނަލުގެ ހަތަރު މެޗު ކުޅުމަށް ވަނީ ހަމަޖެހިފައެވެ. މުބާރާތުގެ ސެމީ ފައިނަލްގެ ދެމެޗް މެއި 20 ވަނަ ދުވަހުގެ ރޭ ކުޅުމަށް ހަމަޖެހިފައިވާ އިރު ފައިނަލް މެޗު އޮންނާނީ މެއި 22 ވަނަ ދުވަހުގެރޭ އެވެ.  

މާދަމާ ރޭ 21:00 ގައި ކުޅޭ މުބާރާތުގެ ގްރޫޕު ސްޓޭޖުގެ ފުރަތަަމަ މެޗުގައި ބައްދަލުކުރާނީ ދިގަލި މޯލްޑިވްސް އާއި ކޯރާ ކޯރާ އެވެ. އަދި 22:00 ގައި ކުޅެވޭ ދެވަަނަ މެޗުގައި ބައްދަލުކުރާނީ ކުޑަފުށި އާއި ރީތިފަރު އެވެ.