ފޯޅަވަހި މައްސަލައާއި ގުޅިގެން ރައީސް އިބްރާހިމް މުހައްމަދު ޞާލިޙް މޮރިޝަސް ގެ ބޮޑު ވަޒީރަށް ފޮނުއްވި ސިޓީފުޅު ބާޠިލް ކުރުމަށް ސްޕްރީމް ކޯޓަށް ހުށަޖެޅުމުން މައްސަލަ ބަލައި ނުގަނެ، ކޯޓުން މައްސަލަ ބޭރު ކޮށްފިއެވެ. 

މޮރިޝަސްގެ ބޮޑު ވަޒީރަށް ރައީސް ޞާލިހް މިދިޔަ އަހަރު ފޮނުއްވެވި ސިޓީ ފުޅަކީ އިނގިރޭސިންގެ ބާރުގެ ދަށުގައި އޮތް ފޯޅަވަހީހެ ސިޔާދަތީ ބާރާގުޅިގެން މޮރިޝަސްއާއި އެއްކޮޅަށް ވޯޓު ދެއްވާނެ ކަމަށް ވިދާޅުވެ ފޮނުއްވެވި ސިޓީފުޅެކެވެ. 

މި ސިޓީ ފުޅާއި އަދި އެއާއި ގުޅިގެން ކޮށްފައިވާ މުޢާމަލާތްތައް ބާޠިލް ކޮށްދިނުމަށް އެދި ސްޕްރީމް ކޯޓަށް ހުށައަޅައިފައިވަނީ ކުރީގެ ހޯމް މިނިސްޓަރ ޢުމަރު ނަސީރާއި އިތުރު ބަޔަކު ގުޅިގެނެވެ. 

Advertisement

ނަމަވެސް ސްޕްރީމް ކޯޓުގެ ރަޖިސްޓްރާ މިއަދު ވަނީ އެމައްސަލަ ބަލައި ނުގަތުމަށް ނިންމަވާފައެވެ. 

 ފޯޅަވަހި މައްސަލައިގައި ސަރުކާރުން ކުއްލި ގޮތަކަށް ސްޓޭންޑް ބަދަލު ކުރުމާއި ގުޅޭގޮތުން ގިނަ ސުވާލުތަކެއް އުފެދިގެންވަނީ ގޮސްފައެވެ. 
އެގޮތުން ކުރީގެ ބަންޑާރަ ނައިބު ޑރ މުހައްމަދު މުނައްވަރު ދެއްވި ޕްރެސް ކޮންފަރެންސްއެއްގައި ވަނީ ސަރުކާރުން ސްޓޭންޑް ބަދަލުކުރީ މޮރިޝަސް ސަރުކާރާއެކު ޑީލު ހަދައިގެންކަމަށް ތުހުމަތު ކުރައްވާފަ އެވެ. އަދި އެ ޑީލުގެ ފަހަތުގައި އިންޑިއާ އޮތްކަމަށް އެމަނިކުފާނު ތުހުމަތު ކުރެއްވި އެވެ. 

އޭގެ އިތުރުން ރައީސް ޞާލިހު މޮރިޝަސްގެ ވެރިންނަށް ފޮނުވި ސިޓީ ހާމަކުރަން ޖެހޭކަމަށް ކުރީގެ ރައީސް ޔާމީން އަބްދުލްގައްޔޫމުވެސް ވަނީ ގޮވާލައްވާފަ އެވެ. އަދި އެސިޓީ ހޯދުމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގުވެސް ހުށައެޅުއްވި އެވެ. 

އެހެން ނަމަވެސް މިހާތަނަށް އެ ސިޓީފުޅު އޮތީ ސިއްރު ސިޓީފުޅެއްގެ ގޮތުގައެވެ. އަދި އޭގައި ލިޔެފައި އޮތް އެއްޗެއްވެސް ސަރުކާރުން ހާމަކޮށްފައެއް ނުވެއެވެ.