ރައީސުލް ޖުމްހުރިއްޔާ ދެއްވާ ޚާއްސަ ސްކޮލަރޝިޕް މިއަހަރު 17 ދަރިވަރަކަށް ދިނުމަށް ހަމަޖެހިއްޖެއެވެ.

މަތީ ސާނަވީ ނިންމާ ދަރިވަރުންނަށް ދޭ ރައީސުލް ޖުމްހޫރިއްޔާގެ ޚާއްޞަ ސްކޮލަރޝިޕް މި އަހަރު ލިބެނީ ހަތް ސްކޫލެއްގެ 17 ދަރިވަރަކަށެވެ.

އެގޮތުން ފަސް މާއްދާއިން އޭ ސްޓަރ ހޯދާ ދަރިވަރުންނަށް ދޭ މި ސްކޮލަރޝިޕް ލިބެނީ ސެންޓަރ ފޮރ ހަޔަރ ސެކަންޑްރީ އެޑިޔުކޭޝަން (ސީއެޗްއެސްއީ)ގެ ނުވަ ދަރިވަރަކަށާއި، އަހުމަދިއްޔާ އިންޓަރނޭޝނަލް ސްކޫލްގެ ތިން ދަރިވަރަކަށާއި، ވިލާ ހައި އިންޓަރނޭޝަނަލް ސްކޫލްގެ އެއް ދަރިވަރަކަށާއި، ގއ. އަތޮޅު ތަޢޫލީމީ މަރުކަޒުގެ ދަރިވަރަކަށާއި، އައްޑޫ ހައި ސްކޫލުގެ ދަރިވަރަކަށާއި، އިހަވަންދޫ ސްކޫލުގެ ދަރިވަރަކަށެވެ. އަދި މިގެ އިތުރުން އަލް މަދްރަސަތަލުލް ޢަރަބިއްޔަތުލް އިސްލާމިއްޔާގެ ދަރިވަރަކަށެވެ.

ރައީސުލް ޖުމްހޫރިއްޔާ ދެއްވާ ޚާއްޞަ ސްކޮލަޝިޕް ލިބެނީ "އިސްލާމް" އަދި "ދިވެހި" ހިމެނޭ ގޮތަށް 5 މާއްދާއިން އޭ ސްޓަރ ހޯދާފައިވުން ނުވަތަ ޝަހާދަ ސާނިވީ އިމްތިޙާނުގައި ބައިވެރިވެ ހުރިހާ މާއްދާއަކުން A އޭ ސްޓަރ ޚާޞިލްކޮށްފައިވުން އަދި ޖީ.ސީ.އީ އޯލެވެލް / އައި.ޖީ.ސީ.އެސް.ސީ ނުވަތަ އެއާ އެއްފެންވަރުގެ އިމްތިޚާނަކުން އިނގިރޭސި "ސީ" އިން ފެށިގެން މަތީ ގްރޭޑެއް ލިބިފައިވާ ދަރިވަރުންނަށެވެ.

މި ސްކޮލަރޝިޕް ލިބޭ ދަރިވަރުން ކިޔަވަން ބޭނުން ދާއިރާއަކުން ބޭނުން ޤައުމެއްގައި ފުރަތަމަ ޑިގްރީ ފުރިހަމަ ކުރުމުގެ ޙަރަދު، ސްކޮލަރޝިޕާބެހޭ އުޞޫލުގައިވާ ގޮތުގެ މަތީން ސަރުކާރުން ހަމަޖައްސައިދެއެވެ. 

ރައީސްގެ ޚާއްޞަ ސްކޮލަޝިޕް ލިބޭ ދަރިވަރުންނަށް ސޮލަރޝިޕްގެ ލިޔުން ހަވާލުކުރުމުގެ ރަސްމިއްޔާތު މި މަހު 15 ދުވަހު ބާއްވަން ހަޔަރ އެޑިޔުކޭޝަން މިނިސްޓްރީން ވަނީ ނިންމާފައެވެ.