ޕާކިސްތާނުގެ ކުރީގެ ބޮޑު ވަޒީރު ޢިމްރާން ޚާން ހައްޔަރުކޮށްފިއެވެ.
ތަހްރިކޭ އެ އިންސާފް ޕާޓިގެ އޮފިޝަލުން ބުނެފައިވަނީ ޢިމްރާން ޙާން، އިސްލާމް އާބާދުގެ ހައި ކޯޓުގެ ބޭރުން ހައްޔަރު ކޮށްފައިވާކަަމަށެވެ.
ޢިމްރާން ކޯޓަށް ހާޒިރުވެފައިވަނީ ދައުލަތަށް ލިބުނު ހަދިޔާ ވިއްކައިގެން ފައިދާ ހޯދި ކަމަށް ތުހުމަތު ކޮށް ހިންގަމުން ގެންދާ ޝަރީޢަތަކަށެވެ. ނަމަވެސް އެމަނިކުފާނު އެ ތުހުމަތުތައް ދޮގުކުރައްވަ އެވެ.
އެޕާޓީގެ އިސް އޮފިޝަލެއް ކަމަށްވާ ފަވާދް ޗައުދްރީ ބުނެފައިވަނީ 72 އަހަރުގެ ޢިމްރާން ހައްޔަރު ކޮށްފައިވަނީ އެންޓި ކޮރަޕްޝަން ކޮމިޝަންގެ އޮފިޝަލުން ކަމަށެވެ.
ޕާކިސްތާނުގެ ބައެއް މީޑިއާތަކުން ބުނެފައިވަނީ ޢިމްރާން ޚާން ހައްޔަރު ކޮށްފައި ވަނީ ކޮރަޕްޝަނާއި ގުޅުން ހުރި މައްސަލައަކާއި ގުޅިގެން ކަމަށެވެ.
ޢިމްރާން ޚާން ބޮޑު ވަޒީރު ކަމުން ވަކި ކޮށްފައިވަނީ 2022 ވަނަ އަހަރު އޭޕްރީލް މަހުގެ ތެރޭގައެވެ. ޢިމްރާން މަގާމުމް ވަކިކޮށްފައިވަނީ އިތުބާރުނެތް ކަމުގެ ވޯޓެއް ނަގައިގެނެވެ. މި ކަމާއި ގުޅިގެން ޢިމްރާން ބުނެފައިވަނީ މި ކަމަކީ ހުޅަނގުން ވާގިވެރިވެގެން މިހާރުގެ ބޮޑުވަޒީރު ޝެހެބާޒް ޝަރީފްގެ ރޭވުމުގެ ދަށުން ކުރެވުނު ކަމެއް ކަމަށެވެ.
ފަވާދް ޗައުދްރީ ބުނެފައިވަނީ ޢިމްރާން ޚާން ހައްޔަރު ކޮށްގެން ވެހިކަލާއި ހަމައަށް ގެންގޮސްފައިވަނީ ގަދަކަމުން ދަމައިފައި ކަމަށެވެ. އަދި މިހާރު ޢިމްރާން ހުންނެވީ ސެކިޔުރިޓީ ފޯހުގެ ބެލުމުގެ ދަށުގައި ކަމަށެވެ. ފަވާދް ޗައުދްރީ ޢިމްރާން ޚާން ހައްޔަރުކުރުން ސިފަކޮށްފައިވަނީ ރަހީނުކުރުމެއް ގެ ގޮތުގައެވެ.
ޢިމްރާން ހައްޔަރު ކުރުމާއި އެކު ޕީޕީޓީގެ މެމްބަރުންނާއި ފުލުހުންނާއި ދެމެދުވަނީ ކުރިމަތިލުން ތަކެއް ހިނގައިފައެވެ. މި ކުރިމަތިލުން ތަކުގައި ޕީޕީޓިގެ މެމްބަރުންނަށާއި، ޢިމްރާން ޙާން ގެ ލޯޔަރުންގެ އިތުރުން ފުލުހުން ތަކަކަށްވެސް އެކި ވަރުގެ އަނިޔާ ލިބިފައިވާ ކަމަށް އަރަބް ނިއުސް ގައި ބުނެފައިވެއެވެ.
ޕީޕީޓީ އިން ވަނީ ޢިމްރާން ޚާން ހައްޔަރު ކުރުމާއި އެކު، އޭނާ ހައްޔަރު ކުރި ސަބަބު ބަޔާން ކޮށްދިނުމަށް އެދި ހައިކޯޓަށް ހުށައަޅައިފައެވެ.
ޢިމްރާން ހައްޔަރު ކުރުމާއި ގުޅިގެން ޕާކިސްތާނުގެ ސަރުކާރުން ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
