މުޅި ފޯޅަވަހީގެ ސިޔާދަތަށް ދިވެހީން ދަޢުވާކުރަންޖެހޭ ކަމަށާ، އެ ތަން އެންމެ ހައްގުކަން ބޮޑީ ދިވެހިންނަށް ކަމަށް ރާއްޖެގެ ކުރީގެ ނައިބު ރައީސް ޑރ މުހައްމަދް ޖަމީލް އަޙްމަދު ވިދާޅުވެއްޖެއެވެ.

ޑރ ޖަމީލް މިހެން ވިދާޅުވީ އެމަނިކުފާނު ކުރެއްވެވި ޓްވީޓެއްގައެވެ.

"ފޯޅަވަހީގެ މައްސަލައިގެ ނިންމުންތައް މި ނިމުނީ ހަމައެކަނި ރައީސް ޞާލިޙު ގެ ސިޓީގެ ސަބަބުން، އެ ސިޓީ ފޮނުވޭނެ ޤާނޫނީ ޙައިޞިއްޔަތެއް ނެތް" ޑރ ޖަމީލް ގެ ޓްވީޓުގައި ވިދާޅުވެފައިވެއެވެ.

Advertisement

ޖަމީލުގެ ޓްވީޓުގައި އިތުރަށް ވިދާޅުވެފައި ވަނީ މުޅި ފޯޅަވަހީގެ ސިޔާދަތަށް ދިވެހީން ދަޢުވާކުރަންޖެހޭ ކަމަށެވެ. އަދި އެތަނަށް އެންމެ ޙައްޤުކަން ބޮޑީ ދިވެހިން ކަމަށާއި، އެއީ ޤައުމަށް ލިބެންޖެހޭ ބޮޑު ސަރަޙައްދެއް ކަމަށާއި ޤައުމަށް ލިބެންޖެހޭ މުއްސަނދިކަމެއް ކަމަށެވެ.

އިޓްލޮސް އިން ފޯޅަވަހީގެ ކަނޑުގެ ފުށުއަރާ މައްސަލައިގައި ހުކުމް އިއްވީ ސަރަހައްދީ އިމުގެ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.

އަދި އެގޮތުން، ބަހާއިރު، އިން ކަނޑައަޅަން ނިންމާފައިވަނީ ރާއްޖެއިން އެދުނު ގޮތަށެވެ. އޭގެ ސަބަބުން ރާއްޖޭގައި މަސްވެރިން މަސްވެރިކަން ކުރާ ކަނޑުގެ ސަރަހައްދުން 50000 އަކަ ކިލޯ މީޓަރަށްވުރެ ބޮޑު ބައެއް ގެއްލޭނެ ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ.