މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގައި މިރޭ ކުޅެވުނު ފުރަތަަމަ މެޗުގައި ފުރަވެރި މޯލްޑިވްސް އަތުން ޖޯލިބީއިން ތަފާތުބޮޑު ނަތީޖާއަކުން މޮޅުވިއިރު، ދެވަަނަ މެޗުގައި ޔޫ އެންޑް މީ އަތުން ހަނިގޮތަކަށް އާރަށް މޮޅުވެއްޖެ އެވެ.

މިރޭގެ ފުރަތަމަ މެޗުގައި ފުރަވެރި މޯލްޑިވްސް އާއި ވާދަކޮށް އެންމެ ފަހުގެ ޗެމްޕިއަން ޖޯލިބީއިން މޮޅުވީ 13-2 ގެ ތަފާތުބޮޑު ނަތީޖާއަކުން ނެވެ. މިމެޗުގެ ފުރަތަމަ ހާފުގައި ޖޯލިބީއިން އިން 6 ލަނޑު ކާމިޔާބުކުރިއިރު ދެވަނަ ހާފުގައި އެޓީމުން އިތުރު 7 ލަނޑު ކާމިޔާބުކުރި އެވެ. 

މި މެޗުގައި ޖޯލިބީއިންގެ އަބްދުﷲ ހަނީފް ފަސް ލަނޑު ކާމިޔާބުކުރިއިރު، އެޓީމުގެ މުހައްމަދު އަޒުހީން ދެ ލަނޑު އަދި ހަސަން ޝާދިން، މުހައްމަދު އަފްރާހްް، ރުޝްދާން އަބްދުލް ޝަކޫރު، ރިސްވާން އަހުމަދު، އިފްރާން މުހައްމަދު ގެ އިތުރުން މުހައްމަދު ރިފާއީ މިއިން ކޮންމެ ކުޅުންތެރިއަކު ވަނީ އެއް ލަނޑު ޖަހާފައެވެ.  ފުރަވެރި މޯލްޑިވްސްގެ ފުރަތަަމަ ލަނޑު ފުރަތަަމަ ހާފުގައި މުހައްމަދު ފަޒީލް ކާމިޔާބުކޮށްދިންއިރު، އެޓީމުގެ ދެވަނަ ލަނޑު ފަހު ހާފުގައި ކާމިޔާބުކޮށްދިނީ މުހައްމަދު ޝައުލާން ހަމީދެވެ. މިރޭގެ މެޗުގެ މޮޅުކުޅުންތެރިއަކަށް ހޮވުނީ މިމެޗުގައި ޖޯލިބީއިން ޓީމަށް ފަސް ލަނޑު ކާމިޔާބުކޮށްދިން އަބްދުﷲ ހަނީފް އެވެ.

މިރޭ ކުޅެވުނު ދެވަނަ މެޗުގައި ޔޫ އެންޑް މީ އާއި ވާދަކޮށް ހެރިޓެންސް އާރަށް މޮޅުވީ ފަހު މިނެޓުގައި ކާމިޔާބު ކުރި ލަނޑާއެކު 2-1 ގެ ނަތީޖާއަކުންނެވެ. މި މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ދެޓީމު އެއްވަރުވެގެންނެވެ.

މި މެޗުގެ ދެވަަނަ ހާފު ފެށިގެން ތިންވަނަ މިނެޓުގައި އާރަށުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު ޖިނާން ޔޫސުފް އެވެ. ދެވަނަ ހާފުގެ 13 ވަނަ މިނެޓުގައި އާރަށު ޓީމުގެ ފަހަތުން ހެދުނު ގޯހެއްގެ ފައިދާ ނަގައި ޔޫ އެންޑް މީ އަށް މެޗުގެ ނަތީޖާ އެއްވަރުކޮށްދިނީ އެޓީމުގެ މުހައްމަދު ޝުހައިލްއެވެ.

މި މެޗުން އާރަށް މޮޅުވި ލަނޑު މެޗުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ އަހުމަދު އާފާގު އެވެ. އަދި މި މެޗުގެ މޮޅުކުޅުންތެރިއަކަށް ހޮވުނީ އާރަށު ޓީމުގެ އިބްރާހިމް އިރުޝާމްއެވެ.

މި މުބާރާތުގައި މާދަމާރޭ ވެސް ދެ މެޗު ކުޅުމަށް ހަމަޖެހިފައިވާއިރު، 21:00 ގައި ފަށާ ފުރަތަމަ މެޗުގައި ބައްދަލުކުރާނީ ޖޯލި މޯލްޑިވްސް އާއި މާމުނަގަ އެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ކޮތައިފަރު އާއި ދަ ސްޓޭންޑަޑެވެ.