ޕާކިސްތާނުގެ ކުރީގެ ޚާރިޖީ ވަޒީރު ޝާޙް މަޙްމޫދު ޤުރައިޝީ ހައްޔަރުކޮށްފިއެވެ.

ޕާކިސްތާނުގެ ކުރީގެ ޚާރިޖީ  ވަޒީރު ޝާޙް މަޙްމޫދަކީ މިހާރު ޕާކިސްތާނުގެ އިދިކޮޅު ޕާޓީ ތަހްރީކޭ އެ އިންސާފްގެ އިސް ލީޑަރެކެވެ.

ޝާޙް މަޙްމޫދު ހައްޔަރު ކޮށްފައިވަނީ އިސްލާމް އާބާދުގެ ރަތް ޒޯނުގެ ގޮތުގައި ކަނޑަ އަޅައި ފައި އޮންނަ ހިސާބުން ކަމަށް އެޤައުމުގެ މީޑިއާތަކުން ރިޕޯޓު ކޮށްފައިވެއެވެ. އޭނާ ހައްޔަރު ކުރި ސަބަބެއް ހާމަކޮށްފައެެއް ނުވެއެވެ.

Advertisement

އިއްޔެގެ ވަގުތެއްގައި އިސްލާމްއާބާދުގެ ހައިކޯޓުގެ ބޭރުން ޢިމްރާން ޚާން ހައްޔަރު ކުރުމާއި ގުޅިގެން ޕާކިސްތާނުގެ އެތައް ބަޔަކު ދަނީ މަގުތަކަށް ނުކުމެ ހަޅުތާލު ތައް ކުރަމުންނެވެ.

ޢިމްރާން ޚާން އިއްޔެ ހައްޔަރު ކުރުމަށްފަހު ފުރަތަމަ ހުންނެވީ ސެކިޔުރިޓީ ފޯހުގެ ބެލުމުގެ ދަށުގައެވެ. ނަމަވެސް މިހާރު ޢިމްރާން ވަނީ ނެޝަނަލް އެކަންޓިބިލިޓި ބިޔުރޯ އާއި 8 ދުވަހުގެ މުއްދަތަށް ހަވާލު ކުރެވިފައި ކަމަށް ބައިނަލްއަޤްވާމީ މީޑިއާ އިން ވަނީ ބުނެފައެވެ.

ޢިމްރާން ހައްޔަރު ކުރެވުމާއި ގުޅިގެން ކުރެވެމުންދާ ހަޅުތާލު ތަކުގެ ތެރެއިން ޕާކިސްތާނުގެ ޕަންޖާބުން މިހާރު ހާހަކަށް ވުރެ ގިނަ މީހުން ވަނީ ހައްޔަރު ކޮށްފައެވެ. އަދި އެހެނިހެން ހިސާބުތަކުންވެސް އެތައް ބަޔަކު ހައްޔަރުކޮށްފައިވެއެވެ. ހަމަ އެހެންމެ ހިނގަމުންދާ ހަމަނުޖެހުން ތަކުގެ ތެރެއިން ބަޔަކު މަރުވެސް ވެފައިވެއެވެ.

ޕާކިސްތާނުގައި ހިނގަމުންދާ ހަމަނުޖެހުން ތަކާއި ގުޅިގެން ބްރިޓިޝް ކައުންސިލުން ވަނީ ޕާކިސްތާނުގެ  ކެމްބްރިޖް އިމްތިހާނު ތައްވެސް ކެންސަލް ކޮށްފައެވެ. އަދި ޕާކިސްތާނުގެ ސިންދުގައި 4 މީހުންނަށްވުރެ ގިނަ މީހުން އެއްތާކަށް އެއްވެ އުޅުންވެސް ވަނީ މަނާކޮށްފައެވެ.

ޢިމްރާން ހައްޔަރު ކުރުމާއި ގުޅިގެން ރުޅިވެރި ކަމާއި އެކު މަގުތަކަށް ނުކުމެ އުޅޭ މުޒާހަރާ ކުރާ މީހުން ދަނީ ސަރުކާރުގެ ބައެއް ތަންތަނަށް ގެއްލުންދީ އަލިފާން ޖެހުން ފަދަ  ކަންކަން ކުރަމުންނެވެ.

ޢިމްރާން ޚާން އިއްޔެ ހައްޔަރުކުރީ ކޮރަޕްޝަން އާއި ގުޅުން ހުރި މައްސަލައަކާއި ގުޅިގެން ކަމަށް ބައިނަލް އަޤްވާމީ މީޑިއާ ތަކުން ވަނީ ބުނެފައެވެ.

ޢިމްރާން އިއްޔެ ހައްޔަރު ކުރީ އިސްލާމް އާބާދުގެ ހައިކޯޓުގައި ކުރިއަށް ދިޔަ މައްސަލައެއްގެ ޝަރީޢަތަށް ވަޑައިގެން ހުންނަވަނި ކޮށެވެ. އެމައްސަލަ އަކީ ބޭރުގެ ޤައުމު ތަކުން ޕާކިސްތާނުގެ ދައުލަތަށް ހަދިޔާކުރި ތަކެތި ނުއަގުގައި ވިއްކާ ނާޖާއިޒު ފައިދާ އެއް ނެގި ކަމަށް ބުނާ މައްސަލައެކެވެ.

ޢިމްރާން ޚާން ވަނީ އޭނަގެ މައްޗަށް ކުރެވޭ މި ތުހުމަތުތަކަށް އިންކާރު ކޮށްފައެވެ.