ށ. ފޭދޫ ބަނދަރު ތަރައްގީ ކުރުމުގެ މަސައްކަތް ނިމިފައިވާކަމަށް އެމްޓީސީސީން ބުނެފިއެވެ.
މިއީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ، އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށް ގެންދިޔަ މަޝްރޫއުއެކެވެ.
މި މަޝްރޫއުގެ އަގަކީ 35.67 މިލިއަން ރުފިޔާއެވެ.
މި މަޝްރޫއުގެ ދަށުން ފޭދޫގައި 27,500 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 378 މީޓަރުގެ ސަރަޙައްދެއްގައި ބޭރުތޮށި ލުމާއި، 90 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 276 މީޓަރުގެ ސަރަޙައްދެއްގައި އެއްގަމުތޮށި ލުމާއި، 1,380 އަކަ މީޓަރުގެ ސަރަހައްދެއްގައި ޕޭވްމެންޓް ހެދުމާއި، މަގުބައްތި ހަރުކުރުމާއި ނެރުބައްތި ހަރުކުރުން ހިމެނެއެވެ.
ބިމުގެ ޖާގަ ތަނަވަސް ފޭސޫގެ ޖުމުލަ އާބާދީއަކީ 1,335 މީހުންނެވެ. މިރަށުގެ ތިންބައިކުޅަ ދެބައި މީހުން ވަނީ މާލެއަށް ހިޖުރަ ކޮށްފައެވެ.
ހިތްގައިމު ކަނޑޫފާއަކާއި ކުޅިއެއް އޮންނަ ފޭދޫގައި ކޮންމެވެސް ވަރަކަށް މަސްވެރިކަންވެސް ކުރެއެވެ.
ފަޅު ކުޑަ، ގާމަތީ ރަށަކަށް ވުމާއެކު ޒަމާނުއްސުރެން ފޭސޫ ރައްޔިތުން ލަފާ ފުރުމުގެ ދަތިކަން ތަހައްމަލު ކުރެއެވެ. އެގޮތުން މޫސުން ގޯސް ދުވަސްވަރު އެރަށު ބަނދަރު ބޭނުން ކުރުމަކީ ދަތި އުނދަގޫ ކަމެކެވެ. އަދި އުޅަނދުފަހަރު ގިނަވުމާއެކު ބަނދަރުގެ ޖާގަ ކުޑަވުމަކީވެސް ފޭދޫ ރައްޔިތުންނަށް ކުރިމަތިވެފައިވާ ދައްޗެކެވެ.'
ނަމަވެސް ބަނދަރު ތަރައްގީ ކުރުމުގެ މަޝްރޫއުއާއެކު ފޭދޫ ރައްޔިތުންނަށް ޖާގަ ތަނަވަސް، ޒަމާނީ ބަނދަރެއް ލިބިފައިވާކަމަށް އެމްޓީސީސީން ފާހަގަ ކުރެއެވެ.
Advertisement
This content is created and paid for by advertisers and does not involve Voice Journalists
