ރައްޔިތުންގެ މަޖިލީހުގެ އިދާރާއަށް ބިލިއަނަރު އެލަން މަސްކުގެ ސްޓާލިންކް ކުންފުނިން ދޭ އިންޓަރނެޓް ލައިދޭނެ ބަޔަކު ހޯދުމަށް އިއުލާނުކޮށްފިއެވެ.

ސްޕޭސް އެކްސް އިން ހިންގާ ސްޓާ ލިންކުންދޭ ހައި ސްޕީޑް އިންޓަނެޓްގެ ހިދުމަތް މަޖިލީހަށް ލައިދޭނެ ބަޔަކު ހޯދުމަށް ގެޒެޓްގައި އިއުލާނު ޖަހާފައިވާއިރު، މިމަހުގެ 14 ގެ ކުރިން ޕްރޮޕޯށަލް ހުށަހެޅުމަށް ރަޖިސްޓްރީކުރަން ޖެހެއެވެ. މިކަން ކޮށްދޭ ބަޔަކު ރައްޔިތުންގެ މަޖިލީހުގެ އިދާރާއަށް ސްޓާރލިނކް ސެޓެލައިޓް އިންޓަރނެޓް ކަނެކްޝަން ސަޕްލައިކޮށް، އިންސްޓޯލް ކުރުމުގެ މަސައްކަތް ކޮށްދޭން ޖެހޭނޭކަމަށް ވަނީ ބަޔާންކޮށްފައެވެ.

ސްޓާލިންކުގެ ހިދުމަތް ރާއްޖެއަށް ދޭން ފަށާފައިވަނީ، 2023 ވަނަ އަހަރުގެ ނޮވެމްބަރުމަހުގެ ތެރޭގައެވެ. ސްޓާލިންކުން ރާއްޖެއަށް ހަތަރު ޕެކޭޖެއް ދީފައިވާއިރު، އެ ހިދުމަތުން 200 އެމްބީޕީއެސްއާ ހަމައަށް ސްޕީޑް ލިބޭނެ އެވެ. މި ޚިދުމަތުގެ އަގަކީ މަހަކު ގާތްގަނޑަކަށް 1000 ރުފިޔާ އެވެ. އަދި މި ޚިދުމަތް ހޯދަން ކަސްޓަމަރުން ނެޓްވޯކާ ގުޅެން، ސެޓެލައިޓް ޑިޝް ކިޓެއް އިންސްޓޯލް ކުރަން ޖެހެއެވެ. މީގެ ކުރިން ދެ ހަފްތާ ތެރޭގައި ޝިޕްކޮށްދޭ އެ ކިޓުގައި، ޑިޝް އެންޓަނާއަކާއި މައުންޓެއްގެ އިތުރުން ވައިފައި ރައުޓަރު ޔުނިޓެއް ހިމެނޭއިރު މި ޕެކޭޖުގެ އަގު ޝިޕިންއާ އެކު 10،300 ރުފިޔާއަށް އަރައެވެ.