ރަސްމާލެ މަޝްރޫއަށް ހުރަސް އެޅުމަށް ކުރީގެ ރައީސް އަބްދުﷲ ޔާމީން އެމްޑީޕީއާ ގުޅިގެން ކުރައްވާ މަސައްކަތް ކާމިޔާބު ނުވާނެ ކަމަށް ވިދާޅުވެ، ދިވެހީންނަކީ ބައެއްގެ ނުފޫޒަށް ލެނބޭ ވަރަށްވުރެ ހަރުދަނާ ބައެއް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އަބްދުއްރަހީމް ވަނީ, ރައީސް ޔާމީންގެ ވެރިކަމުގައި ސައޫދީ އަރަބިއްޔާގެ ކުންފުންޏަކުން ފ. އަތޮޅުގައި ހިންގަން އުޅުނު މަޝްރޫއު ހުއްޓުވުމަށް އެމްޑީޕީން އޭރު މަސައްކަތްކުރި ކަން ފާހަގަކުރައްވައި، ޔޫއޭއީގެ ކުންފުންޏަކުން ރަސްމާލޭގައި ހިންގުމަށް ހަމަޖެހިފައިވާ ބޮޑު މަޝްރޫއަށް ހުރަސް އެޅުމަށް މިހާރު ރައީސް ޔާމީން އިސްވެ ހުންނަވައި އެމްޑީޕީއާ ގުޅިގެން ކުރައްވާ މަސައްކަތާ އެއްވެސް ފަރަގެއް ނެތް ކަމަށް ވިދާޅުވެފަ އެވެ.

އަބްދުއްރަހީމް ވަނީ، ރައީސް ޔާމީން ކުރިން ދެއްކެވި ވާހަކަފުޅުތަކާއި މިއަދު ދައްކަވާ ވާހަކަފުޅުތައް ފުށުއެރުމާ މެދު ސުވާލު އުފައްދަވައިފަ އެވެ. ވިދާޅުވީ، އެ ދުވަހު ރައީސް ޔާމީން ސިފަކުރެއްވީ އެމްޑީޕީން ވެރިކަމުގެ ދަހިވެތިކަމުގައި ގައުމާއި ރައްޔިތުންނަށް ގައްދާރުވުން ކަމަށާ ނަމަވެސް، މިއަދު ހަމަ އެ ދަހިވެތިކަމުގައި ހުދު ރައީސް ޔާމީނަށް ގައުމާއި ރައްޔިތުންނަށް ގައްދާރުވެވެނީ ނޫންތޯ އަބްދުއްރަހީމް ސުވާލު ކުރެއްވި އެވެ.

ވެރިކަމުގެ ދަހިވެތިކަން އިންތިހާއަށް ގޮސް، ތިމާއަށް ކުރެވޭ ނުކުރެވޭ ކަމެއް އަދި ދެއްކެވޭ ވާހަކައެއް ނޭނގޭ ހިސާބަށް ކަންކަން ގޮސްފައިވާ ކަމަށް ވެސް މަޖިލިސް ރައީސް ތުހުމަތު ކުރެއްވި އެވެ.

ރަސްމާލެ މަޝްރޫއާ ގުޅޭ ގޮތުން އަބްދުއްރަހީމް ވިދާޅުވީ، މާތް ﷲ ގެ ތަނަވަސް ރަހުމަތްފުޅުން އެ މަޝްރޫއު ހުއްޓުވުމަކީ ކުރެވޭނެ ކަމެއް ނޫން ކަމަށެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގައި ލަސްތަކެއް ނުވެ އެ ބިޔަ މަޝްރޫއު ފެށޭނެ ކަމުގެ ޔަގީންކަން ދެއްވައި، އެ މަޝްރޫއު ކުރިއަށް ގެންދާނީ ގާނޫނުއަސާސީއާއި ގާނޫނުތަކާ އެއްގޮތަށް ކަމަށް ވެސް ވިދާޅުވެފައި ވެއެވެ.

އަބްދުއްރަހީމް އިތުރަށް ވިދާޅުވީ، މުސްތަގުބަލުގައި މި މަޝްރޫއުގެ ފުރިހަމަ ފައިދާ ދިވެހި ރައްޔިތުންނަށް ލިބޭނެ ކަމަށާއި، ދިވެހީން ބޭނުންވަނީ ހަމަޖެހުމާއި ރައްކާތެރިކަމާއި ތަރައްގީ ކަމަށެވެ. އެމަނިކުފާނުގެ ޝިއާރެއް ކަމަށް ވިދާޅުވީ "އެންމެ ފުރަތަމަ ގައުމު" ކަމަށެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މި މަޝްރޫޢުގެ ފުރަތަމަ މަރުހަލާގެ އެއްބަސްވުމުގައި މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުالله މުއްޠަލިބު އަދި އީގަލް ހިލްސްގެ ޗެއާމަން މުޙައްމަދު އަލާއްބާރު ސޮއިކުރައްވާފައިވާއިރު، މި މަޝްރޫޢުގެ އެކި ފިޔަވަހިތަކުގެ އަންދާޒާ އަގު 20 ބިލިއަން ޑޮލަރުގެ އަދަދަކަށް އަރައެވެ.

މި މަޝްރޫޢުން 54،000 އަށް ވުރެ ގިނަ ވަޒީފާ އުފެދި، އަހަރަކު 2 ބިލިއަން ޑޮލަރުގެ ފަތުރުވެރިކަމުގެ އާމްދަނީއެއް ލިބޭނެ ކަމަށް ސަރުކާރުން ލަފާކުރެއެވެ.