ޕާކިސްޠާނުގެ ކުރީގެ ބޮޑު ވަޒީރު ޢިމްރާން ޚާން ހައްޔަރު ކުރީ ޤާނޫނާއި ޚިލާފަށް ކަމަށް  އެޤައުމުގެ ސްޕްރީމް ކޯޓުން ބުނެފިއެވެ. 

ސްޕްރީމް ކޯޓުން އިސްލާމް އާބާދް ޕޮލޮސް އައިޖީއަށް އަމުރުކުރީ މިއަދުގެ 4:30 ޢިމްރާން ޚާން ސްޕްރީމް ކޯޓަށް ހާޒިރު ކުރުމަށެވެ.

އެގޮތުން މިހާރު ޢިމްރާން ވަނީ ސްޕްރީމް ކޯޓަށް ހާޒިރު ކުރެވިފައެވެ. ސްޕްރީމް ކޯޓުގެ ބޭރުގައި ސެކިޔުރިޓީ ލެވެލް ވަނީ ވަރަށް ބޮޑަށް މަތިކޮޮށްފައި ކަމަށް ޕާކިސްޠާނުގެ ނޫސްވެރިއަކު ބުނެފައިވެއެވެ. އަދި ޢިމްރާން ޚާން ކޯޓުގެ އެތެރެއަށް ވައްދާފައިވަނީ ކޯޓުގެ ބިއްދޮށުގައި ހުންނަަ ނުރަސްމީ ދޮރަކުން ނެވެ. 

ތަހްރީކޭ އެ އިންސާފް ޕާޓީގެ އިސް ލީޑަރުން ޕާޓީގެ ޢާންމު މެމްބަރުންނަށް އިލްތިމާސް ކޮށްފައިވަނީ ސްޕްރީމް ކޯޓުކައިރިއަށް އެއްނުވުމަށެވެ. އެކަމުގެ ސަބަބުން އަޑު އެހުންތައް ލަސް ވެދާނެ ކަމަށާއި ޗީފް ޖަސްޓިސް ޢުމަރް އަޠާ އަށް އެމަނިކުފާނުގެ މަސައްކަތް ކުރިއަށް ގެންދިއުމަށް ފުރުސަތު ދިނުމަށް ބުނެފައިވެއެވެ.

ސްޕްރީމް ކޯޓުން ބުނެފައިވަނީ އަންގާރަދުވަހު ޢިމްރާން ޚާން ހައްޔަރު ކުރެވުނީ ޤާނޫނާއި ޚިލާފަށް ކަަމަށެވެ.
ޢިމްރާން ހައްޔަރުކޮށްފައިވަނީ އިސްލާމް އާބާދުގައި ހުންނަ ހައިކޯޓުގެ ބޭރުންނެވެ.

ޢިމްރާން ޚާން އިއްޔެ ހައްޔަރު ކުރުމަށްފަހު ފުރަތަމަ ހުންނެވީ ސެކިޔުރިޓީ ފޯހުގެ ބެލުމުގެ ދަށުގައެވެ. ނަމަވެސް މިހާރު ޢިމްރާން ވަނީ ނެޝަނަލް އެކަންޓިބިލިޓި ބިޔުރޯ އާއި 8 ދުވަހުގެ މުއްދަތަށް ހަވާލު ކުރެވިފައި ކަމަށް ބައިނަލްއަޤްވާމީ މީޑިއާ އިން ވަނީ ބުނެފައެވެ.

އިއްޔެ އޭނާ ހައްޔަރުކުރީ ކޮރަޕްޝަން އާއި ގުޅުން ހުރި މައްސަލައަކާއި ގުޅިގެން ކަމަށް ބައިނަލް އަޤްވާމީ މީޑިއާ ތަކުން ވަނީ ބުނެފައެވެ.

ޢިމްރާން އިއްޔެ ހައްޔަރު ކުރީ އިސްލާމް އާބާދުގެ ހައިކޯޓުގައި ކުރިއަށް ދިޔަ މައްސަލައެއްގެ ޝަރީޢަތަށް ވަޑައިގެން ހުންނަވަނި ކޮށެވެ. އެމައްސަލަ އަކީ ބޭރުގެ ޤައުމު ތަކުން ޕާކިސްތާނުގެ ދައުލަތަށް ހަދިޔާކުރި ތަކެތި ނުއަގުގައި ވިއްކާ ނާޖާއިޒު ފައިދާ އެއް ނެގި ކަމަށް ބުނާ މައްސަލައެކެވެ.

ޢިމްރާން ޚާން ވަނީ އޭނަގެ މައްޗަށް ކުރެވޭ މި ތުހުމަތުތަކަށް އިންކާރު ކޮށްފައެވެ.

ޢިމްރާން ހައްޔަރުރުމާއި ގުޅިގެން ޕާކިސްތާނުގެ  އެކު ހިސާބުތަކުގައި ވަނީ މުޒާހަރާ ތައް ކޮށް ހަމަނުޖެހުންތައް ހިންގައިފައެވެ.

އަދި އިމްރާން ޚާންގެ ޕާޓީ ތަހްރީކޭ އެ އިންސާފަށް ނިސްބަތްވާ އާންމުންގެ އެތައް ބަޔަކާއީ އިސް ބައެއް ލީޑަރުންވެސް ހައްޔަރު ކޮށްފައިވެއެވެ.

އަދި މި ހަމަނުޖެހުން ތަކުގެ ސަބަބުން އެތައް  ބަޔަކަށް އަނިޔާވެ މަރުވެސް ވެފައިވެއެެވެ.