އއ. އުކުޅަހު ބަނދަރުގައި އޮތް ރާ ވިއްކާ ކަމަށް ތުހުމަތު ކުރެވޭ ސަފާރީ އާއި ގުޅިގެން ރައްޔިތުން ކަންބޮޑުވުން ފާޅުކުރަންފެށިތާ ހަފްތާއެއް ފަހުން، ކޯޓު އަމުރު ނެރެގެން ފުލުހުން އެ ސަފާރީ ބަލައި ފާސްކޮށްފި އެވެ.
އުކުޅަހު ފަޅުން ބޭރުގައި އޮތް އިރުވެސް ރާ ވިއްކާ ކަމަށް މީގެ ކުރިން ތުހުމަތު ކުރެވިފައިވާ "ޒެޑް ކުރޫޒާ" ނަމަކަށް ކިޔާ މި ސަފާރީ މަރާމާތަށް ކަމަށް ބުނެ އެ ރަށު ބަނދަރަށް ވައްދާފައިވަނީ މިމަހުގެ 2 ވަނަ ދުވަހުގެ ރޭގައި ކަމަށް އުކުޅަހު ކައުންސިލްގެ ރައީސް ޝައުކަތު އިބްރާހިމް ވަނީ ވޮއިސް އަށް މައުލޫމާތު ދެއްވާފައެވެ. އަދި އެ ސަފާރީ ބަނދަރަށް ވައްދާފައިވަނީ ކައުންސިލުން ހުއްދަ ނުވެސް ދެނިކޮށް ކަމަށާ، އެއިން ރަށަށް ރާ ވިއްކާ ކަމަށް އެރަށު ރައްޔިތުން ތުހުމަތު ކުރާ ކަމަށްވެސް އޭނާ ވިދާޅުވި އެވެ.
އަދި އެ ސަފާރީ މީގެ ކުރިން ފަޅުން ބޭރުގައި އޮތް އިރުވެސް ވަރަށް ފާޅުކަން ބޮޑުކޮށް ރާ ވިއްކުމުގެ ކަންކަން ކުރިކަން އޭނާ އާއި އެރަށުގެ މީހުންނަށްވެސް އެނގޭކަން ކައުންސިލް ރައީސް ވަނީ ރައްޔިތުންނާއިއެކު ބޭއްވުނު ބައްދަލުމުގައި ފާހަގަކުރައްވާފައެވެ.
މި މައްސަލާގައި ރައްޔިތުންގެ ހުރި ކަންބޮޑުވުންތައް ހިއްސާކޮށް މިމަހު 6 ވަނަ ދުވަހުން ފެށިގެން އުކުޅަހު ކައުންސިލާއި ފުލުހުންނާއި އެކު އެފަރާތްތަކުން ވަނީ ވާހަކަދައްކައި، ސަފާރީ ބޭރު ކުރެވޭނެ ގޮތަކާއި މެދު މަޝްވަރާ ކޮށްފައެވެ.
އަދި މައްސަލަ ރިޕޯޓް ކޮށްފައިވޭތޯ އާއި އެކަމާއި ގުޅިގެން ފުލުހުން އެއްވެސް ފިޔަވަޅެއް އަޅާފައިވޭތޯ ބެލުމަށް މިމަހު 7 ވަނަ ދުވަހުން ފެށިގެން "ވޮއިސް" އިން ވެސް ފުލުހުންނާއި ސުވާލު ކޮށްފައިވާއިރު މައްސަލަ ރިޕޯޓް ނުކުރާ ކަމަށް ބުނުން ފިޔަވައި އިތުރު އެއްޗެއް ފުލުހުން ވިދާޅުނުވެއެވެ.
އެއަށްފަހު މައްސަލަ ހޫނުވެ، ރައްޔިތުން ކައުންސިލް ބަންދުކޮށް، ރަށުގެ ނެރުވެސް މިއަދު ބަންދު ކޮށްފައިވާއިރު، އެކަމާއި ގުޅިގެން މިއަދު ވޮއިސް އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، އެ ސަފާރީން ބަނގުރާ ވިއްކާ ކަމުގެ ޝަކުވާ ލިބެމުންދާތީ މިމަހު 8 ވަނަ ދުވަހު ސަފާރީ ބަލައި ފާސްކޮށްފައިވާ ކަމަށެވެ. އަދި އެދުވަހު ބަލައި ފާސްކުރިއިރު ތުހުމަތު ކުރެވޭފަދަ އެއްވެސް އެއްޗެއް ފެނިފައި ނުވާ ކަމަށްވެސް މީޑިއާ އޮފިޝަލް ވިދާޅުވިއެވެ.
"ނަމަވެސް ސަފާރީ ފަޅުތެރެއިން ނެރުމަށް ރައްޔިތުން އެދެމުންދާތީ ކައުންސިލުން ފުލުހުންގެ އެހީތެރިކަމަށް އެދިފައިވޭ. އެހެން ކަމުން މިކަމުގައި ކައުންސިލަށް އަމަލުކުރެވިދާނެ ގޮތުގެ ލަފާ ފުލުހުން ވާނީ ދީފައި." މީޑިއާ އޮފިޝަލް ވިދާޅުވިއެވެ.
މިއާއެކު ފުލުހުންގެ މީޑިއާ އޮފިޝަލް ވިދާޅުވީ، ސަފާރީ ފަޅުގައި އޮތުމުން ރައްޔިތުން ހިތްހަމަނުޖެހުން ފާޅުކުރަމުންދާތީ ފުލުހުން ހަރަކާތްތެރިވަމުންދާ ކަމަށެވެ.
Advertisement
This content is created and paid for by advertisers and does not involve Voice Journalists
