މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގައި ގުރޫޕް "އޭ"ގައި އަލީލާ ކޮތައިފަރު 1-0 ގެ ނަތީޖާއަކުން ބަލިކޮށް ކޯރާކޯރާ އިން ގުރޫޕްގެ އެއްވަނަ މަގާމަށް ކުރިއަށް ޖެހިލައިފިއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވުނު ނަމަވެސް މިހާފުގައި ދެ ޓީމަށް ވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބި ބޭނުންކުރެވޭ ގޮތްނުވެފައެވެ.

ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މެޗު ނިމެން ތިން މިނިޓަށްވެފައި ވަނިކޮށް ކޯރާކޯރާ އިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ މުހައްމަދު އިސާމް އެވެ. އަދި މިރޭގެ މެޗުގެ މޮޅުކުޅުންތެރިޔާގެ މަގާމު ލިބުނީ ވެސް އިސާމް އަށެވެ.

މިރޭގެ މެޗުން ލިބުނު ތިން ޕޮއިންޓާއެކު ކޯރާކޯރާ މޯލްޑިވްސް އަށް ދެ މެޗު ކުޅެގެން ހަތަރު ޕޮއިންޓް ލިބިފައިވާއިރު، މިވަގުތު އެޓީމު އޮތީ މި ގުރޫޕްގެ އެއްވަނައިގައެވެ. ހަތަރު ޓީމު ހިމެނޭ މިގުރޫޕްގެ ދެވަނައިގައި އޮތީ ދަ ސްޓޭންޑާޑް އެވެ. އެޓީމަށް އެއް މެޗު ކުޅެގެން ތިން ޕޮއިންޓް ލިބިފައިވާއިރު، ތިންވަނައިގައި މިވަގުތު އޮތީ ދިގަލި މޯލްޑިވްސް އެވެ. އެޓީމަށް އެއް މެޗު ކުޅެގެން އެއް ޕޮއިންޓް ލިބިފައިވާއިރު ގުރޫޕްގެ ފުލުގައި އޮތީ ކުޅުނު ދެ މެޗުން ވެސް ބަލިވެ ޕޮއިންޓެއް ނުލިބި އޮތް އަލީލާ ކޮތައިފަރު އެވެ.

މިމުބާރާތުގައި މާދަމާ ރޭ ވެސް ދެ މެޗު ކުޅުމަށް ހަމަޖެހިފައިވާއިރު 21:00 ގައި ފަށާ ފުރަތަމަ މެޗުގައި ބައްދަލުކުރާނީ މީދުއްޕަރު އާއި އާރަށެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ކޮށްޓެއްފަރާއި ޖޯލިބީއިން އެވެ.