މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023"  ގުރޫޕް "ބީ" ގައި މިރޭ ކުޅެވުނު މެޗުގައި 3-1 ގެ ނަތީޖާއަކުން މާމުނަގައު ބަލިކޮށް ރީތިފަރު ރިސޯޓުން މުބާރާތުގެ ފުރަތަަމަ މޮޅު ހޯދައިފިއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ރީތިފަރު ރިސޯޓުންނެވެ. މި ލަނޑު ފުރަތަަމަ ހާފުގެ 7 ވަނަ މިނެޓުގައި އެޓީމަށް ކާމިޔާބުކޮށްދިނީ މައިޝާން މުހައްމަދު އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރީތިފަރު ކުރީގައި އޮވެގެންނެވެ.

ދެވަަނަ ހާފުގައި ރީތިފަރު ޓީމުން އިތުރު ދެ ލަނޑު ކާމިޔާބުކުރިއިރު، މި ދެ ލަނޑު ވެސް ކާމިޔާބުކޮށްދިނީ އެޓީމުގެ އަބްދުﷲ މުސައްވިރު އެވެ. އަދި މެޗު ނިމެން ތިން މިނިޓަށްވެފައި ވަނިކޮށް މާމުނަގައު އަށް ނަތީޖާ ފަރަގު ކުޑަކޮށްދިނީ އެޓީމުގެ އަލީ ނިޔާޒު އެވެ. އަދި މިރޭގެ މެޗުގެ މޭން އޮފް ދަ މެޗަކަށް ހޮވުނީ ރީތިފަރު ޓީމުގެ މައިޝަން މުހައްމަދު އެވެ.

މިރޭގެ މެޗުން ލިބުނު ތިން ޕޮއިންޓާއެކު ދެ މެޗު ކުޅެގެން ރީތިފަރު ޓީމަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ހަތަރު ޓީމު ހިމެނޭ ގްރޫޕް "ބީ"ގެ ތިންވަނައިގައެވެ. މިގުރޫޕްގެ އެއްވަނައިގައި މިވަގުތު އޮތީ އެއް މެޗު ކުޅެގެން ތިން ޕޮއިންޓާ، ފައިދާ 7 ގޯލާއިއެކު ޖޯލި މޯލްޑިވްސް އެވެ. ދެވަނައިގައި އޮތް ކުޑަފުށި ޓީމަށް ވެސް ތިން ޕޮއިންޓް ލިބިފައިވާއިރު، އެޓީމު ދެވަނައިގައި އޮތީ ފައިދާ 6 ގޯލާއެކުގައެވެ. މި ގުރޫޕްގެ ފުލުގައި އޮތީ ކުޅުނު ދެ މެޗުން ވެސް ބަލިވެ ޕޮއިންޓެއް ނުލިބި އޮތް މާމުނަގައު އެވެ.

މިމުބާރާތުގައި މާދަމާ ރޭ ވެސް ދެ މެޗު ކުޅުމަށް ހަމަޖެހިފައިވާއިރު 21:00 ގައި ފަށާ ފުރަތަމަ މެޗުގައި ބައްދަލުކުރާނީ މީދުއްޕަރު އާއި އާރަށެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ކޮށްޓެއްފަރާއި ޖޯލިބީއިން އެވެ.