ފަރުޟު ނަމާދުތަކުގެ ޖަމާޢަތުގައި ސަފުހަދާއިރު މިސްކިތުގައި ހުންނަ ތަނބު ތަކުގެ ސަބަބުން ސަފުތައް މެދުކެނޑޭގޮތް މެދުވެރި ވެއެވެ.

އެކަމަށް އަލި އަޅުވާލައި އައްޝެއިޚް ހަސަން މޫސާ ފިކުރީ ދެއްވާފައިވާ ދަރުހެއްގައި ޝެއިޚު ވަނީ، ދެތަނބު ދޭތެރޭގައި ސަފު ހެދުމުގެ ހުކުމާއި ގުޅޭގޮތުން ވަރަށް ތަފްސީލީ ޖަވާބެއް ދެއްވާފައެވެ. 

އެގޮތުން ޝެއިޚް ވިދާޅުވީ، ދެތަނބު ދޭތެރޭގައި ޞަފު ނުހެދުމަށް ކީރިތި ރަސޫލާ ޞައްލަالله ޢަލައިހި ވަސައްލަމަ އަމުރު ކުރައްވާފައިވާ ކަމަށާ އެއީ އޭގެ ސަބަބުން ޞަފުތައް މެދުކެނޑިގެން ދާތީވެއެވެ.

Advertisement

އެގޮތުން ޝެއިޚް ވަނީ ރަސޫލާ ޞައްލައްالله ޢަލައިހި ވަސައްލަމްގެ އަރިހުން ޤުއްރަތު ބިން އިޔާޟް ރިވާ ކުރައްވާފައިވާ ހަދީޘް ބަސްފުޅާއި އޭގެ މާނަ ޝެއިޚް ވަނީ ކިޔައި ދެއްވާފައެވެ. 

(كُنَّا نُنْهَى أَنْ نَصُفَّ بَيْنَ السَّوَارِي عَلَى عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ ) صححه الألباني في “صحيح ابن ماجة”

މާނައީ: رسول الله صلّي الله عليه وسلّم ގެ ޒަމާނުގައި ތަނބުތަކުގެ މެދުގައި ނަމާދު ކުރުން ތިމަންމެނަށް ނަހީކުރެއްވިއެވެ.

ޝެއިޚް ވިދާޅުވީ ބައެއް މިސްކިތް ތަކުގައި ބައެއް ނަމާދު ތަކުގައި، ވަރަށް މަދު ސަފު ހެދިފައި ހުރެފައި، މިސްކިތުގައި ބޮޑު ހުސްޖާގަ އޮންނަ އިރުވެސް ތަނބުތަކާއި ދިމާވާގޮތަށް ހުންނަ ރޮނގުގައި ޖަމާއަތް ހަދާތަން ފެންނަ ކަމަށެވެ. އެހެން ނަމަވެސް، މިސްކިތުގައި ޖާގަ އޮންނަ ހާލަތުގައި ދެތަނބުގެ ދޭތެރޭގައި ސަފު ހެދުމުން ދުރުހެލިވުމަށް ޝެއިޚް ވަނީ ނަސޭހަތްތެރިވެފައެވެ. 

އަދި އެފަދަ ހާލަތްތަކުގައި، ތަނބުތައް ހުރި ސަފު ދޫކޮށް، އެއާއި ޖެހިގެން ތަނބު ނުލައި ހުންނަ ސަފުގައި ސަފުތައް ހެދުމަށްވެސް ޝެއިޚް ވަނީ ނަސޭހަތްތެރިވެފައެވެ. އަދި އެއީ އެކަމުގައި އެންމެ އެދެވިގެންވާ ގޮތްކަމުގައިވެސް ޝެއިޚް ވިދާޅުވި އެވެ. އެހެނީ ތަނބުތައް ހުރި ސަފުގައި ސަފު ހެދުމުން ޞަފުތައް މެދު ކެނޑިގެންދާނެތީއެވެ. 

ކަން މިހެން ހުރި ނަމަވެސް ނަމާދު ކުރާ މީހުން ގިނަވެ މިސްކިތުގެ ޖާގަ ދަތިވެއްޖެ ހިނދެއްގައި ދެތަނބު ދޭތެރޭ ޞަފު ހެދުމަކީ ހުއްދަ ކަމެއް ކަމަށް ޝެއިޚު ވިދާޅުވި އެވެ. 

والله أعلم