މާލެ ސަރަހައްދަށް ރޭ ޖެހުނު ގަދަ ވަޔާއެކު ސިނަމާލެ ބްރިޖު ކައިރިއަށް އޮޔާދިޔަ ތެޔޮ ބޯޓް ޖެހި ބްރިޖަށް ލިބުނު ގެއްލުންތައް ބަލަމުންދާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މި ތެޔޮ ބޯޓު އުތުރު ފަރާތުން އޮޔާ އައިސް އެންމެ ފުރަތަމަ ޖެހުނީ ސިނަމާލެ ބްރިޖުގެ ތަނބެއްގައެވެ. ތަނބުގައި ޖެހުމުގެ ސަބަބުން ބޯޓަށް އެކި ވަރުގެ ގެއްލުންތައް ލިބިފައިވެ އެވެ.
މިނިސްޓަރު ވިދާޅުވީ ބްރިޖަށް ލިބުނު ގެއްލުން ކުންފުނިން ބަލަމުންދާ ކަމަށާ މިހާތަނަށް ބެލި ބެލުމުން ބްރިޖުގެ ސްޓްރަކްޗާއަށް ގެއްލުމެއް ލިބިފައިނުވާކަން ޔަގީން ކުރެވިފައިވާ ކަމަށެވެ. ނަމަވެސް ކުދި ރެނދުލުން ފަދަ ކަންކަން ދިމާވެފައިވާ ކަމަށާ އެކަމާއި ގުޅިގެން ކުރަން ޖެހޭ ކަންކަން ކުރާނެ ކަމަށެވެ.
ނުރައްކާތެރި ހާދިސާއެއް, އިތުރު ފިޔަވަޅުތަކެއް
މިނިސްޓަރު ވިދާޅުވި ގޮތުގައި މިގޮތަށް ބޮޑު އުޅަނދެއް އޮޔާގޮސްފިނަމަ ވަރަށް ބޮޑެތި ގެއްލުންތައް ލިބުމުގެ ފުރުސަތު އެބަ އޮތެވެ. ހާއްސަކޮށް ބްރިޖާއި ވެލާނާ އިންޓަނޭޝަނަލް އެއާޕޯޓަށް ލިބިދާނެ ގެއްލުން ފާހަގަ ކުރެއްވި އެވެ.
އެހެން ކަމުން އެފަދަ ހާދިސާއެއް ހިނގާފާނެ ކަމަށް ފިޔަވަޅުތަކެއް އަޅަން ނިންމާފައިވާ ކަމަށް ވިދާޅުވި އެވެ. އެންމެ މުހިންމު ކަމަކަށް ފާހަގަ ކުރެއްވީ އޮޔާދާ ނޫނީ ކޮންޓްރޯލް ނުކުރެވޭ ހާލަތެއްގައި އެފަދަ އުޅަނދުފަހަރު ބުރިޖާ ހަމައަށް ފޯރުމުގެ ކުރިން ހިފެހެއްޓޭނެ ފަދަ އެކަމަށް ހާއްސަ ޓަގު ބޯޓް ހޯދުމުގެ މަސައްކަތެވެ.
އެފަދަ ދެ ޓަގު ބޯޓު ހޯދުމުގެ މަސައްކަތް އެމްޕީއެލް އިން ކުރަމުންދާ ކަމަށް މިނިސްޓަރު ވިދާޅުވި އެވެ. އަމާޒަކީ ދެ މަހެއްހާ ދުވަހުގެ ތެރޭގައި ބޯޓްތައް ގެނައުން ކަމުގައި ވިދާޅުވި އެވެ.
Advertisement
This content is created and paid for by advertisers and does not involve Voice Journalists
