މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "ޑީ" ގައި މިރޭ ކުޅެވުނު މެޗުގައި 4-1 ގެ ނަތީޖާއަކުން އާރަށް ބަލިކޮށް މީދުއްޕަރުން މުބާރާތުގެ ފެށުން ރަނގަޅުކޮށްފި އެވެ. 

މިރޭގެ މެޗުގެ ވަރަށް ކުރީކޮޅު މީދުއްޕަރުން ލަނޑެއް ކާމިޔާބުކޮށް މެޗުގެ ލީޑު ހޯދިއިރު، މި ލަނޑު ފުރަތަމަ ހާފުގެ ތިންވަނަ މިނެޓުގައި އެޓީމަށް ކާމިޔާބުކޮށްދިނީ ނާޖިހު މުހައްމަދު އެވެ. އަދި ފުރަތަަމަ ހާފު ނިމުނުގެ ކުރިން ނާޖިހު ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މެޗުގެ ދެވަނަ ހާފުގައި ދިހަވަނަ މިނެޓުގައި މީދުއްޕަރުގެ ތިންވަނަ ލަނޑު ކާމިޔާބުކޮށްދިނީ އެޓީމުގެ އަބްދުﷲ މުހައިމިން އަސްލަމެވެ. މިއީ އެޓީމުގެ ނާޖިހު މުހައްމަދު މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި މީދުއްޕަރުން ކާމިޔާބުކުރި ހަތަރުވަނަ ލަނޑު މެޗު ނިމެން ދެ މިނިޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ ނާޖިހު ޖަމީލް އެވެ. މިމެޗުގައި އާރަށުން ކާމިޔާބުކުރި ހަމައެކަނި ލަނޑު މެޗުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ އިރުޝާދު މުހައްމަދު އެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ މިރޭގެ މެޗުގައި މީދުއްޕަރު ޓީމަށް ދެ ލަނޑު ކާމިޔާބުކޮށްދިން ނާޖިހު މުހައްމަދު އެވެ.

މިރޭގެ މެޗުން ލިބުނު ތިން ޕޮއިންޓާއެކު ލަނޑުގެ ތަފާތުން ގުރޫޕް "ޑީ" އެއްވަނަ މީދުއްޕަރަށް ލިބުނުއިރު، މިގުރޫޕްގެ ދެވަނައިގައި އޮތީ މިރޭ މެޗުން ބަލިވި އާރަށެވެ. އެޓީމަށް ވެސް ތިން ޕޮއިންޓް ލިބިފައިވާއިރު ތިން ޓީމު ހިމެނޭ ގުރޫޕް "ޑީ" ގެ ފުލުގައި މިވަގުތު އޮތީ ގްރޫޕްގެ ފުރަތަަމަ މެޗުގައި އާރަށް އަތުން ބަލިވި ޔޫ އެންޑް މީ އެވެ.

މި މުބާރާތުގައި މާދަމާ ރޭ ވެސް ދެ މެޗު ކުޅުމަށް ހަމަޖެހިފައިވާއިރު 21:00 ގައި ފަށާ ފުރަތަމަ މެޗުގައި ބައްދަލުކުރާނީ ކުޑަފުށި އާއި ޖޯލި މޯލްޑިވްސް އެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ދިގަލި މޯލްޑިވްސް އާއި ދަ ސްޓޭންޑާޑް އެވެ.