އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ނޮޓިންހަމް ފޮރެސްޓާއި އެއްވަރުވެ މިސީޒަނުގައި ލީގުގެ ގަދަ 10 ގައި ހިމެނުމުގެ ފުރުސަތު ޗެލްސީއަށް ހަނިވެއްޖެ އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ޗެލްސީ އިން މެޗު ޑޮމިނޭޓުކުރި ނަމަވެސް، މިހާފުގައި ފުރަތަަމަ ލަނޑުޖަހައި ކުރިހޯދީ ފޮރެސްޓުންނެވެ. މި ލަނޑު ފުރަތަމަ ހާފުގެ 13 ވަނަ މިނެޓުގައި އެޓީމަށް ކާމިޔާބު ކޮށްދިނީ އެޓީމުގެ ނައިޖީރިއާ ފޯވާޑް ޓައިވޯ އަވޮނިޔީ އެވެ. މިއީ އެޓީމުގެ ބްރެޒިލް ޑިފެންޑަރު ލޯޑީ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ޗެލްސީ އިން އެންމެ ހުސް ފުރުސަތެއް ލިބުނީ އެޓީމުގެ ޕޯޗުގަލް ފޯވާޑް ޖައާއު ފެލިކްސް އަށެވެ. ފުރަތަަމަ ހާފުގެ 34 ވަނަ މިނެޓުގައި ފެލިކްސް ބޮލުން ފޮނުވާލި ހަމަލާ ފޮރެސްޓްގެ ގޯލު ކީޕަރު ނަވާސް ވަނީ ދިފާއުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފޮރެސްޓް ކުރީގައި އޮވެގެންނެވެ.

ދެވަަނަ ހާފު ފެށިގެން ވެސް އެންމެ ފުރަތަަމަ ނުރައްކާތެރި ހަމަލާއެއް ފެނިގެންދިޔައީ ފޮރެސްޓްގެ ފަރާތުންނެވެ. ނަމަވެސް ދެވަަނަ ހާފުގެ 51 ވަނަ މިނެޓުގައި ޗެލްސީއަށް މެޗުގެ ނަތީޖާ އެއްވަރުކޮށްދިނީ އެޓީމުގެ އިގިރޭސި ފޯވާޑް ރަހީމް ސްޓާލިން އެވެ. މިއީ ފޮރެސްޓްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ޗެލްސީ އިން ނަތީޖާ އެއްވަރުކުރިތާ 07 މިނެޓު ފަހުން ރަހީމް ސްޓާލިން ވަނީ އެޓީމަށް އިތުރު ލަނޑެއް ކާމިޔާބުކޮށްދީ، ފުރަތަަމަ ފަހަރަށް މި މެޗުގައި ޗެލްސީއަށް ލީޑު ހޯދައިދީފައެވެ. ނަމަވެސް އޭގެ ހަތަރު މިނެޓު ފަހުން ފޮރެސްޓުން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ނައިޖީރިއާ ގެ ފޯވާޑް ޓައިވޯ އަވޮނިޔީ އެވެ.

މިރޭގެ މެޗުން ލިބުނު އެއް ޕޮއިންޓާއެކު 35 މެޗު ކުޅެގެން ޗެލްސީއަށް 43 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ 11 ވަނައިގައެވެ. ލީގު ތާވަލުގެ 10 ވަނައިގައި އޮތް ބްރެންޓްފޯޑަށް 35 މެޗުން ވަނީ 50 ޕޮއިންޓް ލިބިފައެވެ. އަދި މިރޭގެ މެޗުން ލިބުނު އެއް ޕޮއިންޓާއެކު 36 މެޗު ކުޅެގެން ފޮރެސްޓަށް ލިބިފައިވަނީ 34 ޕޮއިންޓާއެކު ތާވަލްގެ 16 ވަނައެވެ.