އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 2-0 ގެ ނަތީޖާއަކުން ވުލްވްސް ބަލިކޮށް މެންޗެސްޓާ ޔުނައިޓެޑުން ތާވަލުގެ ފަސްވަނައިގައި އޮތް ލިވަޕޫލް އާއި ދެމެދުގައިވާ ފަރަގު ހަތަރު ޕޮއިންޓަށް ފުޅާކޮށްފިއެވެ.

ޕްރިމިއާ ލީގުގެ ކުރީގައި އޮތް މެންޗެސްޓާ ސިޓީ އާއި އާސެނަލް އިން ޗެންޕިއަންސް ލީގުގެ ޖާގައެއް ކަށަވަރުކޮށްފައިވާއިރު، ބާކީ އޮތް ދެޖާގައަށް ލިވަޕޫލުގެ އިތުރުން ނިއުކާސަލް އާއި މެންޗެސްޓާ ޔުނައިޓެޑް އަންނަނީ ވާދަކުރަމުންނެވެ. ލީގުގައި ކޮންމެ ޓީމަކަށް ބާކީ ތިން މެޗު އޮތްއިރު، ނިއުކާސަލް އަދި މެންޗެސްޓާ ޔުނައިޓެޑް މިވަގުތު އޮތީ ލިވަޕޫލަށް ހަތަރު ޕޮއިންޓް ކުރީގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިރޭ މެޗުގެ ފުރަތަަމަ ހާފުގައި ޔުނައިޓެޑުން ލީޑު ނެގީ 32 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ފްރާންސްގެ ފޯވާޑް އެންތަނީ މާޝިއަލް އެވެ. މިއީ އެޓީމުގެ ބްރެޒިލް ފޯވާޑް އެންޓޮނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

Advertisement

ފުރަތަަމަ ހާފުގައި ވުލްވްސް އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް މިހާފުގައި ޔުނައިޓެޑުން ވަނީ 16 ފުރުސަތު ތަނަވަސްކޮށްފައެވެ. އަދި އޭގެ ތެރެއިން ހަތަރު ހަމަލާއެއް ވުލްވްސްގެ ގޯލާ އަމާޒުވެފައިވާ އިރު މިހާފުގައި ޔުނައިޓެޑުގެ ގޯލާ އަމާޒުކޮށް ވުލްވްސްއަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

ދެވަަނަ ހާފުގައި ވުލްވްސް އިން ކުޅުން ރަގަޅު ކުރި ނަމަވެސް މިހާފުގައި ވެސް އެޓީމަށް ޔުނައިޓެޑުގެ ގޯލާއި އަމާޒުކޮށް ނުރައްކާތެރި ހަމަލާއެއް ފޮނުވާލެވިފައެއް ނުވާއިރު، މި މެޗުގައި ޔުނައިޓެޑް އިން ކާމިޔާބުކުރި ދެވަނަ ލަނޑު، މެޗުގެ 90 މިނެޓު ކުޅުން ހަމަވެގެން އިތުރަށް ދެއްކި 06 މިނެޓުގެ ތެރެއިިން 04 ވަނަ މިނެޓުގައި ކާމިޔާބުކޮށްދިނީ އެޓީމުގެ ޒުވާން ފޯވާޑް އަލްޖަންޑްރޯ ގަނާޗޯ އެވެ. މިއީ އެޓީމުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. 

މިރޭގެ މެޗުން ލިބުނު ތިން ޕޮއިންޓާއެކު 35 މެޗު ކުޅެގެން މެންޗެސްޓާ ޔުނައިޓެޑަށް 63 ޕޮއިންޓް ލިބިފައިވާއިރު، ތިންވަނައިގައި އޮތް ނިއުކާސަލް ޔުނައިޓެޑަށް ވެސް ވަނީ މި އަދަދަށް ޕޮއިންޓް ލިބިފައެވެ. ނަމަވެސް އެޓީމަށް ކުރި ލިބެނީ ފައިދާ ގޯލުގެ ތަފާތުންނެވެ. މީގެ އިތުރުން ގަދަ ހަތަރަކަށް ވާދަކުރަމުން އަންނަ ލިވަޕޫލް 35 މެޗު ކުޅެފައިވާއިރު، އެޓީމަށް ލިބިފައިވަނީ 62 ޕޮއިންޓާއެކު ތާވަލްގެ ފަސްވަނަ އެވެ. އަދި މިރޭ މެޗުން ބަލިވި ވުލްވްސް 36 މެޗު ކުޅެފައިވާއިރު، އެޓީމަށް ލިބިފައިވަނީ 40 ޕޮއިންޓާއެކު ތާވަލްގެ 13 ވަނަ އެވެ.