މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "އޭ" ގައި މިރޭ ކުޅެވުނު މެޗުގައި 5-0 ގެ ނަތީޖާއަކުން ދަ ސްޓޭންޑާޑް ބަލިކޮށް ދިގަލި މޯލްޑިވްސް މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފިއެވެ. 

މިރޭގެ މެޗުގެ ފުރަތަަމަ ހާފުގައި ދިގަލި މޯލްޑިވްސްގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، ފުރަތަަމަ ހާފު އެޓީމުން ނިންމާލީ 4-0 ގެ ނަތީޖާއަކުން ކުރީގައި އޮވެގެންނެވެ. މިހާފުގައި އެޓީމުގެ މުހައްމަދު އިރުޝަމް ދެ ލަނޑު ކާމިޔާބުކޮށްދިން އިރު، އަނެއް ދެ ލަނޑު ކާމިޔާބުކޮށްދިނީ މުހައްމަދު މަމްދޫހު އާއި އަލީ މުހައްމަދު އެވެ.

މެޗުގެ ދެވަނަ ހާފުގައި ދަ ސްޓޭންޑާޑް އިން އެޓީމުގެ ކުޅުން ރަގަޅުކުރި ނަމަވެސް، ދިގަލި މޯލްޑިވްސްގެ ގޯލު ފޫއަޅުވާލެވޭ ގޮތެއްނުވިއެވެ. މިހާފުގައި ފެނިގެންދިޔަ ހަމައެކަނި ލަނޑު ދިގަލި މޯލްޑިވްސްއަށް ކާމިޔާބުކޮށްދިނީ އެޓީމުގެ އަބްދުﷲ ނަބީހުއެވެ. އަދި މި މެޗުގެ މޭން އޮފް ދަ މެޗަކަށް ހޮވިފައިވަނީ ދިގަލި މޯލްޑިވްސްގެ މުހައްމަދު އިރުޝަމް އެވެ.

މިރޭގެ މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް، ގޯލުގެ ތަފާތުން ގުރޫޕް "އޭ" ގެ އެއްވަނައިގައި މިވަގުތު އޮތީ ދިގަލި މޯލްޑިވްސް އެވެ. ގުރޫޕްގެ ދެވަނައިގައި އޮތް ކޯރާކޯރާ އަށްވެސް ހަތަރު ޕޮއިންޓް ލިބިފައިވާއިރު، ތިންވަނައިގައި އޮތީ ދެ މެޗުން ލިބުނު ތިން ޕޮއިންޓާއެކު ދަ ސްޓޭންޑާޑް އެވެ. 

ހަތަރު ޓީމު ހިމެނޭ މިގުރޫޕް "އޭ"ގެ ފުލުގައި އޮތް އަލީލާ ކޮތައިފަރު ކުޅުނު ދެ މެޗުން ވެސް ބަލިވެފައިވާއިރު، ބާކީ އެއް މެޗު އޮއްވައި އެޓީމު ވަނީ މުބާރާތުން ކަޓާފައެވެ. އަދި މިގުރޫޕުން ކުއާޓާ ފައިނަލުގެ ޖާގައެއް ދިގަލި މޯލްޑިވްސް އިން ކަށަވަރުކޮށްފައިވާ އިރު، ގުރޫޕް 'އޭ" އިން ކުއާޓާ ފައިނަލުގެ ދެވަނަ ޖާގަ ލިބިގެންދާނީ ގުރޫޕް "އޭ" ގައި މާދަމާ ރޭ ދަ ސްޓޭންޑާޑް އާއި ކޯރާކޯރާ ވާދަކުރާ މެޗުން މޮޅުވާ ޓީމަކަށެވެ. އެ މެޗު އެއްވަރުވެއްޖެ ނަމަ ގުރޫޕް "އޭ" އިން ކުއާޓާގެ ފުރުސަތު ލިބޭނީ ދިގަލި މޯލްޑިވްސް އަދި ކޯރާކޯރާ އަށެވެ.

މި މުބާރާތުގެ ދެ މެޗު މާދަމާރޭ ވެސް ކުޅުމަށް ހަމަޖެހިފައިވާ އިރު، 21:00 ގައި ވާދަކުރާ މެޗުގައި ބައްދަލުކުރާނީ ގްރޫޕް "އޭ" ކޯރާކޯރާ އާއި ދަ ސްޓޭންޑާޑް އެވެ. އަދި 22:00 ގައި ކުޅޭ މެޗުގައި ބައްދަލުކުރާނީ ގްރޫޕް "ބީ"ގެ ރީތިފަރު ރިސޯޓާއި ޖޯލި މޯލްޑިވްސް އެވެ.