މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "ބީ" ގައި މިރޭ ކުޅެވުނު މެޗުގައި ޖޯލި މޯލްޑިވްސް އާއި ކުޑަފުށި ވާދަކުރި މެޗު 3-3 ގެ ނަތީޖާއަކުން އެއްވަރުވެއްޖެ އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ޖޯލި މޯލްޑިވްސް އިންނެވެ. މި ލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އެޓީމުގެ ނަޒީހް އިސްމާއިލް އެވެ. 

ފުރަތަަމަ ހާފުގެ ކުޅުން ނިމެން ފަސް މިނެޓަށް ވެފައި ވަނިކޮށް ކުޑަފުށީ ޓީމަށް ނަތީޖާ އެއްވަރުކޮށްދިނީ އެޓީމުގެ މުހައްމަދު އާސިފްއެވެ. މިއީ އަރިމަތިން އެޓީމުގެ ކުޅުންތެރިއަކު ޖޯލި މޯލްޑިވްސްގެ ޕެނަލްޓީ އޭރިއާ ތެރެއަށް މަތިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގެ 08 ވަނަ މިނެޓުގައި ޖޯލި މޯލްޑިވްސް އިން ލަނޑެއް ކާމިޔާބުކޮށް ދެވަަނަ ފަހަރަށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ މޫސާ ލަތީފް އެވެ. އަދި އޭގެ ހަތަރު މިނެޓު ފަހުން އެޓީމުގެ މިދުހަތު މުހައްމަދު ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މެޗު ނިމެން ފަސް މިނެޓަށް ވެފައި ވަނިކޮށް ކުޑަފުށީ ޓީމަށް ނަތީޖާގެ ފަރަގު ކުޑަކޮށްދިނީ އެޓީމުގެ މުހައްމަދު އަޔާޒް އެވެ. އަދި އޭގެ މިނެޓެއް ފަހުން އެޓީމުގެ އަހުމަދު ޒިހާން ވަނީ ލަނޑެއް ކާމިޔާބުކޮށް މި މެޗުގައި ދެވަނަ ފަހަރަށް އެޓީމަށް ނަތީޖާ އެއްވަރުކޮށްދީފައެވެ. މިއާއެކު މެޗުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެ ޓީމު އެއްވަރުވެގެންނެވެ. އަދި މިރޭގެ މެޗުގެ މޮޅު ކުޅުންތެރިޔަކަށް ހޮވުނީ ކުޑަފުށީ ޓީމުގެ މުހައްމަދު އާސިފްއެވެ.

މިރޭގެ މެޗުން ލިބުނު އެއް ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް ގުރޫޕް ބީގެ އެއްވަނައިގައި މިވަގުތު އޮތީ ޖޯލި މޯލްޑިވްސް އެވެ. ދެވަނައިގައި އޮތް ކުޑަފުށި ޓީމަށް ވެސް ހަތަރު ޕޮއިންޓް ލިބިފައިވާއިރު، ޖޯލި މޯލްޑިވްސްއަށް ކުރި ލިބެނީ ފައިދާ ގޯލުގެ ތަފާތުންނެވެ. ގުރޫޕް "ބީ" ގެ ތިންވަނައިގައި އޮތީ ދެ މެޗު ކުޅެގެން ތިން ޕޮއިންޓް ލިބިފައިވާ ރީތިފަރުގެ ޓީމެވެ. އަދި މިގުރޫޕްގެ ފުލުގައި އޮތް މާމުނަގައު ވަނީ ކުޅުނު ދެ މެޗުން ވެސް ބަލިވެ، ބާކީ އެއް މެޗު އޮއްވައި މުބާރާތުން ކަޓާފައެވެ.

މި މުބާރާތުގެ ދެ މެޗު މާދަމާރޭ ވެސް ކުޅުމަށް ހަމަޖެހިފައިވާ އިރު، 21:00 ގައި ވާދަކުރާ މެޗުގައި ބައްދަލުކުރާނީ ގްރޫޕް "އޭ" ކޯރާކޯރާ އާއި ދަ ސްޓޭންޑާޑް އެވެ. އަދި 22:00 ގައި ކުޅޭ މެޗުގައި ބައްދަލުކުރާނީ ގްރޫޕް "ބީ"ގެ ރީތިފަރު ރިސޯޓާއި ޖޯލި މޯލްޑިވްސް އެވެ.