ވ. އާރަށް ކުއްޔަށްދިނުމުގެ މުޢާމަލާތާ ގުޅިގެން ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓަށް ހުށަހެޅި މަނީ ލޯންޑްރިންގގެ ކުށުގެ ދަޢުވާގައި ހިމެނޭ ކުށްކޮށްގެން ހޯދާފައިވާ ކަމަށް ބުނާ 52 މިލިއަން ރުފިޔާ ދައުލަތަށް ނެގުމުގެ ބައި ދިވެހިރާއްޖޭގެ ހައިކޯޓުގައި އިސްތިއުނާފުކުރުމަށް ހުށަހަޅައިފިއެވެ. 

ޕީޖީ އޮފީހުން މި މައްސަލަ ހައިކޯޓަށް ހުށަހަޅާފައިވަނީ މެއި މަހުގެ 7 ދުވަހުއެވެ. 

ދައުލަތުން އިސްތިއުނާފް ކޮށްފައިވަނީ ރައީސް ޔާމީން ލޯންޑަރކުރިކަމަށް ސާބިތުވެފައިވާ 1 މިލިއަން އެމެރިކާ ޑޮލަރާއި، އެ ފައިސާއާ އެއްކޮށްފައިވާ 2،413،230 (ދެމިލިއަން ހަތަރުލައްކަ ތޭރަހާސް ދުއިސައްތަ ތިރީސް) އެމެރިކާ ޑޮލަރާއި މި ފައިސާ އިންވެސްޓްކޮށްގެން ލިބިފައިވާ މަންފާ އެވެެ.

މި މައްސަލަ ކްރިމިނަލް ކޯޓަށް ހުށަހެޅިއިރު އެ ފައިސާ ދައުލަތަށް ނަގައިދިނުމުގެ އަމުރެއް ނެރެދެއްވުމަށް ދައުލަތުން ވަނީ އެދިފައެވެ. ނަމަވެސް މައްސަލަ ސާބިތުވާކަމަށް ނިންމައި ޙުކުމްކުރިއިރު މި ފައިސާއާމެދު ކްރިމިނަލް ކޯޓުން ވަކި ގޮތެއް ނިންމަވާފައެއްނުވެއެވެ.

އެހެންކަމުން އެކަން ސިޓީއަކުން ކްރިމިނަލް ކޯޓުގެ ސަމާލުކަމަށް ގެނެސް، ދެން ކުރިއަށްދާންވީގޮތް ސާފުކޮށްދެއްވުމަށް އެދުމުން، "ކުށްކޮށްގެން ހޯދާފައިވާ މުދަލާއި ފައިސާ ދައުލަތަށް ނެގުން" ގެ އަމުރެއް އެކޯޓުން ވަނީ ނެރެފައެވެ. އެ އަމުރު ރައީސް ޔާމީންގެ ފަރާތުން ދިވެހިރާއްޖޭގެ ހައިކޯޓުގެ އިސްތިއުނާފުކުރުމުން ކްރިމިނަލް ކޯޓުގެ އެ އަމުރު ބާޠިލުކަމަށް ހައިކޯޓުން ވަނީ ކަނޑައަޅާފައެވެ.

ޕީޖީ އޮފީހުން ބުނީ، މި މައްސަލަ ހައިކޯޓުގައި އިސްތިއުނާފުކޮށްފައިވާނީ 52 މިލިއަން ރުފިޔާ ދެއްކުމަށް ރައީސް ޔާމީންގެ މައްޗަށް ނެރުނު ކޯޓު އަމުރު، ހައިކޯޓުން ބާޠިލުކުރުމާއި ގުޅިގެން ކަމަށެވެ.