މޯލްޑިވްސް ރިފޯމް މޫވްމެންޓް (އެމްއާރްއެމް) އިން އެޕާޓީގެ ހުސްވެފައިވާ މަޤާމުތަކަށް ކުރިމަތިލުމަށް ހުޅުވައިލައިފިއެވެ.

މި ކަމާއި ގުޅިގެން އެޕާޓީ  އިން ކޮށްފައިވާ އިއުލާނެއްގައި ބުނެފައިވަނީ އެ ޕާޓީގެ ހުސްވެފައިވާ މަގާމުތަކުގެ އިންތިހާބު މި މަހުގެ 24 ވަނަ ދުވަހު ބޭއްވުމަށް ނިންމާފައިވާ ކަމަށެވެ.

ކުރިމަތިލުމަށް ހުޅުވާލައިފައިވަނީ ޕާޓީގެ ނައިބް ރައީސް، ޒުވާނުންގެ ކައުންސިލުގެ ރައީސް، އެގްޒެކެޓިވް ކޮމިޓީގެ މެމްބަރު (އަންހެން)، އެގްޒެކެޓިވް ކޮމިޓީގެ މެމްބަރު (ފިރިހެން)، ޒުވާނުންގެ ކައުންސިލްގެ މެންބަރު ފިރިހެން (10 މަގާމު)، ޒުވާނުންގެ ކައުންސިލްގެ މެންބަރު އަންހެން (8 މަގާމު) ، އަދި އަންހެނުންގެ ކައުންސިލްގެ މެންބަރު (13 މަގާމު) މިއެވެ.  

Advertisement

އިއުލާނުގައި ބުނެފައިވަނީ މަގާމުތަކަށް ކުރިމަތިލުމަށް ބޭނުންވާ އެ ޕާޓީގެ މެމްބަރުންނަށް މިއަދުން ފެށިގެން މި މަހުގެ 18 ވަނަ ދުވަހުގެ ހަވީރު 4:00 އަށް ފުރުސަތު ހުޅުވާލާފައިވާ ކަމަށެވެ.

އެހެންކަމުން އިންތިހާބަށް ކުރިމަތިލުމަށް އެދޭ ފޯމު ފުރިހަމަ ކުރުމަށް ފަހު ޕާޓީ އޮފީހަށް ހުށަހެޅުމަށް އެމްއާރްއެމްއިން ވަނީ އެދިފަ އެވެ.

އެމްއާރްއެމްއިން ބުނީ އެ މަގާތުތަމަށް ކުރިމަތިލުމަށް އެދި ފުރިހަމަކުރާ އެޕްލިކޭޝަން ފޯމާއި އިންތިހާބުގެ ޓައިމްލައިން އެ ޕާޓީގެ ވެބްސައިޓް އަދި ޕާޓީގެ އޮފީހުން ލިބެން ހުންނާނެ ކަމަށެވެ.

އެމްއާރްއެމް އަކީ މި ހިނގާ ސަރުކާރުގެ ކޯލިޝަންގައި ހިމެނޭ ޕާޓީއެކެވެ. އެޕާޓީގެ ފަރާތުން ސަރުކާރުގެ އިސް މަގާމުތަކެއް ފުރަމުންދިޔަ މެމްބަރުންތަކެއް ވަނީ ޕާޓީ އިން ވަކިވެފައެވެ.