އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 3-0 ގެ ނަތީޖާއަކުން ބްރައިޓަން އަތުން ބަލިވެ، ލީގު ހޯދުމަށް އާސެނަލް އިން ކުރަމުން އަންނަ މަސައްކަތަށް ހުރަސް އެޅިއްޖެއެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ބްރައިޓަން އިން ވަނީ ލަނޑު ޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. މިގޮތުން ފުރަތަަމަ ހާފުގައި 12 ވަނަ މިނެޓުގައި އެޓީމުގެ ޒުވާން ފޯވާޑް ޖޫލިއޯ އެންސިސޯއަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާ އާސެނަލްގެ ކީއްޕަރު ދިފާއުކުރިއިރު،  އޭގެ ހަތަރު މިނެޓު ފަހުން އާސެނަލްގެ ކެޕްޓަން މާޓިން އޮޑެގާޑް ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ލިބި ބޭނުންކުރެވޭ ގޮތްނުވެފައެވެ.

ފުރަތަަމަ ހާފުގައި 31 ވަނަ މިނެޓުގައި އާސެނަލްގެ ބެލްޖިއަމް މިޑްފީލްޑަރު ލިއަންޑުރޯ ޓްރޮސާޑް ފޮނުވާލި ހަމަލާ ގޯލުގެ ހުރަސް ދަނޑިއަށް އަމާޒުވިއިރު، ފުރަތަަމަ ހާފުގެ އިތުރު ވަގުތުގެ ތެރޭގައި އެޓީމުގެ އިގިރޭސި ފޯވާޑް ސަކާއަށް ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ލިބި ބޭނުންކުރެވޭ ގޮތްނުވެފައެވެ.

ފުރަތަަމަ ހާފުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ނިމުނު ނަމަވެސް، ދެވަނަ ހާފުގެ ވަރަށް ކުރީކޮޅު ބްރައިޓަން އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު ދެވަނަ ހާފުގެ 51 ވަނަ މިނެޓުގައި އެޓީމަށް ކާމިޔާބުކޮށްދިނީ ޒުވާން ފޯވާޑް ޖޫލިއޯ އެންސިސޯ އެވެ. މިއީ އެޓީމުގެ އިކުއެޑޯގެ ޑިފެންޑަރު ޕަރވިސް އެސްޓުޕިނަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބްރައިޓަންގެ ދެވަނަ ލަނޑު ފަހު ހާފުގެ 86 ވަނަ މިނެޓުގައި ކާމިޔާބުކޮށްދިނީ އެޓީމުގެ ޖަރުމަނު ފޯވާޑް ޑެނިޒް އުންޑާވް އެވެ. މިއީ އެޓީމުގެ ޖަރުމަނު މިޑްފީލްޑަރު ޕާސްކަލް ގްރޮސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މި މެޗުގައި އެޓީމުން ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އިކުއެޑޯގެ ޑިފެންޑަރު ޕަރވިސް އެސްޓުޕިނަން އެވެ.

މިރޭގެ މެޗުން ލިބުނު ތިން ޕޮއިންޓާއެކު ލީގުގައި ކުޅުނު 36 މެޗުން އާސެނަލް އަށް 81 ޕޮއިންޓް ލިބިފައިވާއިރު، އެއްވަނައިގައި އޮތް މެންޗެސްޓާ ސިޓީއަށް 35 ކުޅެގެން ވަނީ 85 ޕޮއިންޓް ލިބިފައެވެ. ލީގުގައި ސިޓީއަށް ބާކީ ތިން މެޗު އޮތްއިރު، ލީގު ޗެމްޕިއަންކަން ކަށަވަރުކުރުމަށް އެޓީމަށް މިހާރު ބޭނުންވަނީ ތިން ޕޮއިންޓެވެ.

މިރޭގެ މެޗުން ލިބުނު ތިން ޕޮއިންޓާއެކު ބްރައިޓަން އަށް 34 މެޗު ކުޅެގެން 58 ޕޮއިންޓް ލިބިފައިވާއިރު، މިވަގުތު އެޓީމު އޮތީ ލީގު ތާވަލްގެ ހަ ވަނައިގައެވެ.