މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "އޭ" ގައި މިރޭ ކުޅެވުނު މެޗުގައި ދަ ސްޓޭންޑާޑް 5-3 ގެ ނަތީޖާއަކުން ބަލިކޮށް ކޯރާކޯރާ އިން މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފިއެވެ.

މެޗުގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަމަ ލަނޑުޖަހައި ކުރިހޯދީ ކޯރާކޯރާ އިންނެވެ. މި ލަނޑު ފުރަތަމަ ހާފުގެ ހަތަރުވަނަ މިނެޓުގައި އެ ޓީމަށް ކާމިޔާބުކޮށްދިނީ މުހައްމަދު ނިޒާމް އެވެ. ދަ ސްޓޭންޑާޑް ޓީމަން މެޗުގެ ނަތީޖާ އެއްވަރުކޮށްދިނީ ފުރަތަމަ ހާފުގެ 10 ވަނަ މިނެޓުގައި އެޓީމުގެ ކެޕްޓަން އަލީ ޝުކޫރު އެވެ 

ފުރަތަަމަ ހާފު ނިމެން ފަސް މިނެޓަށް ވެފައި ވަނިކޮށް މި މެޗުގައި ދެވަނަ ފަހަރަށް ކޯރާކޯރާ އިން ލީޑު ނެގިއެވެ. މިއީ އެޓީމުގެ ގޯލްކީޕަރު އަހުމަދު މުނައްވަރު އަމިއްލަ ހާފުތެރޭގައި ހުރެ ފޮނުވާލި ބާރު ހަމަލާއެއް ގޯލުގެ ތެރެއަށް ވައްދާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ކޯރާކޯރާ ކުރީގައި އޮވެގެންނެވެ.

ދެވަނަ ހާފު ފެށިގެން ފަސްވަނަ މިނެޓްގައި ކޯރާކޯރާ އިން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު އަޖުވަދު އެވެ. ނަމަވެސް އޭގެ ތިން މިނެޓު ފަހުން ދަ ސްޓޭންޑާޑް އިން އިތުރު ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރިއެވެ. މިލަނޑު އެޓީމަށް ކާމިޔާބުކޮށްދިނީ ކެޕްޓަން އަލީ ޝުކޫރު އެވެ.

މެޗު ނިމެން ފަސް މިނެޓަށް ވެފައި ވަނިކޮށް ދެވަަނަ ފަހަރަށް ދަ ސްޓޭންޑާޑް އިން މެޗުގެ ނަތީޖާ އެއްވަރުކުރި އެވެ. މި ލަނޑު އެޓީމަށް ކާމިޔާބުކޮށްދިނީ ހަސަން ނައުޝާދު އެވެ. މި ލަނޑާއެކު 3-3 ގެ ނަތީޖާއަކުން ދެޓީމް އެއްވަރުވެގެން މެޗު ނިމެން ދަނިކޮށް މެޗުގެ ފަހު ދެ މިނެޓު ތެރޭގައި ކޯރާކޯރާ އިން ވަނީ އިތުރު ދެ ލަނޑު ކާމިޔާބުކޮށް މެޗުގެ ނަތީޖާ 5-3 އަށް ބަދަލުކޮށްފައެވެ. މި ދެ ލަނޑުވެސް އެޓީމަށް ކާމިޔާބުކޮށްދިނީ މުހައްމަދު އިސާމް އެވެ.

ކޯރާކޯރާގެ ހަތަރު ވަނަ ލަނޑު މެޗު ނިމެން ދެ މިނިޓަށްވެފައި ވަނިކޮށް އިސާމް ކާމިޔާބުކޮށްދިންއިރު، އެޓީމުގެ ފަސްވަނަ ލަނޑު އޭނާ ކާމިޔާބުކޮށްދިނީ މެޗުގެ އެންމެ ފަހު މިނެޓްގައެވެ. އަދި މި މެޗުގެ މޭން އޮފް ދަ މެޗަކަށް ހޮވިފައިވަނީ މިރޭގެ މެޗުގައި މޮޅުކުޅުމެއް ދެއްކި ކޯރާކޯރާ ގެ މުހައްމަދު އިސާމް އެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު ކުޅުނު ތިން މެޗުން ކޯރާކޯރާ އަށް 07 ޕޮއިންޓް ލިބިފައިވާއިރު، އެޓީމު މިވަގުތު އޮތީ ގްރޫޕް "އޭ" ގެ އެއްވަނައިގައެވެ. މިގުރޫޕްގެ ދެވަނައިގައި އޮތީ ކުޅުނު ދެ މެޗުން ހަތަރު ޕޮއިންޓް ހޯދާފައިވާ ދިގަލި މޯލްޑިވްސް އެވެ. ގުރޫޕް "އޭ" އިން މި ދެޓީމަށް ވެސް ކުއާޓާ ފައިނަލުގެ ޖާގައެއް ކަށަވަރުވެފައިވާއިރު، މިގުރޫޕްގައި ދަ ސްޓޭންޑާޑް އަދި އަލީލާ ކޮތައިފަރު ވަނީ މުބާރާތުން ކަޓާފައެވެ. 

މި މުބާރާތުގައި މާދަމާރޭ ވެސް ދެ މެޗު ކުޅުމަށް ހަމަޖެހިފައިވާއިރު 21:00 ގައި ފަށާ ފުރަތަމަ މެޗުގައި ބައްދަލުކުރާނީ ގްރޫޕް "ސީ" ފުރަވެރި މޯލްޑިވްސް އާއި ޖޯލިބީއިން އެވެ. އަދި 22:00 ގައި ފަށާ ދެވަނަ މެޗުގައި ބައްދަލުކުރާނީ ގްރޫޕް "ޑީ" ގެ މީދުއްޕަރު އާއި ޔޫ އެންޑް މީ އެވެ.