މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "ބީ" ގައި މިރޭ ކުޅެވުނު މެޗުގައި ރީތިފަރު 9-2 ގެ ތަފާތުބޮޑު ނަތީޖާއަކުން ބަލިކޮށް ޖޯލި މޯލްޑިވްސް އިން މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފިއެވެ.

މިރޭގެ މެޗުގެ ފުރަތަަމަ ހާފުގައި ޖޯލި މޯލްޑިވްސްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މި ހާފުގައި އެޓީމުން ވަނީ 06 ލަނޑު ކާމިޔާބުކޮށްފައެވެ. މިހާފުގައި އެޓީމުގެ ފުރަތަަމަ ލަނޑު އިބްރާހީމް ރިފްއަތު ކާމިޔާބުކޮށްދިނީ އެޓީމުގެ ދެވަަނަ ލަނޑު ކާމިޔާބުކޮށްދިނީ މުހައްމަދު އަމީން އެވެ.

ފުރަތަަމަ ހާފުގައި ޖޯލި މޯލްޑިވްސްގެ ތިންވަނަ ލަނޑާއި ހަތަރުވަނަ ލަނޑު ކާމިޔާބުކޮށް އިބްރާހީމް ރިފްއަތު ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި މިހާފުގައި އެޓީމުން ކާމިޔާބުކުރި ފަސްވަނަ ލަނޑާއި ހަވަނަ ލަނޑު ކާމިޔާބުކޮށްދިނީ މޫސަ ލަތީފް އެވެ.

Advertisement

ވެހެމުންދިޔަ ބޯވާރޭގެ ތެރޭގައި ކުޅެމުންދިޔަ ދެވަަނަ ހާފު ފެށިގެން ދެވަނަ މިނެޓުގައި ޖޯލި މޯލްޑިވްސްގެ 07 ވަނަ ލަނޑު ކާމިޔާބުކޮށްދިނީ އެޓީމުގެ މުހައްމަދު ޖުމާން އެވެ. އޭގެ ދެ މިނެޓު ފަހުން ރީތިފަރު ޓީމުން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުﷲ މުސައްވިރު އެވެ.

ޖޯލި މޯލްޑިވްސް އިން މި މެޗުގައި ކާމިޔާބުކުރި 08 ވަނަ ލަނޑު މުހައްމަދު ޖުމާން ކާމިޔާބުކޮށްދިންއިރު، އެޓީމުގެ 09 ވަނަ ލަނޑު ކާމިޔާބުކޮށްދިނީ އިބްރާހިމް ރިފްއަތު އެވެ. މިއީ މި މެޗުގައި އޭނާގެ ކާމިޔާބުކުރި ހަތަރުވަނަ ލަނޑެވެ. 

ރީތިފަރު ޓީމުން މި މެޗުގައި ކާމިޔާބުކުރި ދެވަނަ ލަނޑު މެޗުގެ އެންމެ ފަހު މިނެޓްގައި އެޓީމަށް ކާމިޔާބުކޮށްދިނީ މައިސަން މުހައްމަދު އެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ މިރޭގެ މެޗުގައި ޖޯލި މޯލްޑިވްސްއަށް ހަތަރު ލަނޑު ކާމިޔާބުކޮށްދިން އިބްރާހީމް ރިފްއަތު އެވެ.

މިރޭގެ މެޗުން ލިބުނު ތިން ޕޮއިންޓާއެކު، ކުޅުނު ތިން މެޗުން ލިބުނު 07 ޕޮއިންޓާއެކު ގްރޫޕް "ބީ" ގެ އެއްވަނައިގައި މިވަގުތު އޮތީ ޖޯލި މޯލްޑިވްސް އެވެ. މިގުރޫޕްގެ ދެވަނައިގައި ކުޅުނު ދެ މެޗުން ލިބުނު 04 ޕޮއިންޓާއެކު އޮތީ ކުޑަފުށި އެވެ. މި ގުރޫޕުން މިދެޓީމަށް ވެސް މުބާރާތުގެ ކުއާޓާ ފައިނަލުން ޖާގައެއް ކަށަވަރުވެފައިވާއިރު، މި ގުރޫޕުގައި ހިމެނޭ ރީތިފަރު އަދި މާމުނަގައު ވަނީ މުބާރާތުން ކަޓާފައެވެ.